மராட்டிய மாநிலம் போல் தமிழ்நாடு அரசும் ஜாதிவாரி கணக்கெடுப்பு நடத்த வேண்டும்! ஜாதி ஒழியும் வரை இடஒதுக்கீடு வேண்டும்!

 

தலையங்கம் : இடஒதுக்கீடு

ஜனவரி 16-31 2020

உண்மை இதழ்

மராட்டிய மாநிலம் போல் தமிழ்நாடு அரசும் ஜாதிவாரி கணக்கெடுப்பு நடத்த வேண்டும்!

ஜாதி ஒழியும் வரை இடஒதுக்கீடு வேண்டும்!

 

மகாராட்டிர மாநில சட்டமன்றத்தில், கடந்த புதன்கிழமையன்று (8.1.2020) சபாநாயகரே, தாமே முன்வந்து ஒரு முக்கிய தீர்மானத்தை முன்மொழிந்துள்ளார்.

அதை ஒருமனதாக அனைவரும் வழிமொழிந்து நிறைவேற்றியுள்ளனர்.

வருகின்ற மக்கள் தொகை கணக்கெடுப்பின்போது ஜாதி வாரியாக மக்கள் தொகையும் இணைத்து எடுக்கப்படல் வேண்டும்; அப்போதுதான் இதர பிற்படுத்தப்பட்ட சமூக மக்கள்  (Other Backward Classes) தொகை எவ்வளவு என்பது துல்லியமாகக் கண்டறியும் வாய்ப்பு ஏற்படும் என்றும் தனது முன்மொழிவின் விளக்கத்தில் கூறியிருக்கிறார்கள்.

தமிழ்நாடு அரசு தெரிந்துகொள்ளட்டும்!

புதிய மக்கள் தொகை கணக்கெடுப்பு 2021 இல் தொடங்கி நடைபெறவிருக்கிறது.

இதற்குப் பா.ஜ.க.வின் முன்னாள் முதல்வரும், இந்நாள் எதிர்க்கட்சித் தலைவருமான தேவேந்திர பட்னாவிசும் தனது கட்சியின் ஆதரவினைத் தெரிவித்துள்ளார்.

இதைத் தமிழ்நாடு அரசும், மற்ற அனைத்து மாநிலங்களின் அரசும் வற்புறுத்தவேண்டும்.

இக்கோரிக்கை நம்மால் பல ஆண்டுகளுக்கு முன்பே வற்புறுத்தப்பட்ட ஒன்றாகும்.

‘‘ஜாதி வாரியாக மக்கள் தொகை கணக்கெடுப்பா? மக்களை இப்படிப் பிரித்துக் கணக்கெடுப்பது நியாயமா? அதிலும் ஜாதி ஒழிப்புக்கான இயக்கம் போன்ற திராவிடர் கழகம் இதனை வற்புறுத்தலாமா? அது முரண்பாடு அல்லவா?’’ என்று மேலெழுந்தவாரியாக இப்பிரச்சினையை நோக்கும் சிலர் கேட்கக்கூடும்.

ஏன் இட ஒதுக்கீடு?

நமது லட்சியம் ஜாதியற்ற சமூகம் காண்பதுதான்; ஆனால், அதே ஜாதி தர்மம் (குலதர்மம் – மனுதர்மம்) காரணமாக பல்லாயிரக்கணக்கான ஆண்டுகளாக கல்வி, உத்தியோக வாய்ப்புகள் மறுக்கப்பட்ட பல கோடி மக்கள் மற்ற முன்னேறிய ஜாதி – வகுப்பினருக்குச் சமமாக ஆகும் நிலை வரும்வரை, அவர்களுக்கு இட ஒதுக்கீடு தரவேண்டியது அவசியம் என்பதால்தான், இந்திய அரசமைப்புச் சட்டமே சமூகநீதிக் கண்ணோட்டத்தில் ஒடுக்கப்பட்ட சமூகத்தவர்களான (மலைவாழ்) பழங்குடியினர், தாழ்த்தப்பட்ட சமூகத்தினர், மிகவும் பிற்படுத்தப்பட்ட, பிற்படுத்தப்பட்ட மக்களுக்கு இட ஒதுக்கீடு தருவது அவசியம் என்று வரையறுத்து, மூன்று  முக்கிய அரசமைப்புச் சட்டத் திருத்தங்களையும் உள்ளடக்கி, நிலைநாட்டியுள்ளது.

உச்சநீதிமன்றமும் தனது 9 நீதிபதிகள் அமர்வுமூலம் மண்டல் வழக்குமூலம் இதை (இந்திரா சகானி வழக்கு) ஏற்றுள்ளது.

ஜாதிக் கணக்கெடுப்புமூலம்தான் ஜாதி புகுத்தப்படுகிறதா?

சட்டத்தில் ஜாதி!

இருக்கின்ற யதார்த்த நிலை என்ன?

1. இந்திய அரசமைப்புச் சட்டத்திலே ‘‘தீண்டாமை’’தான் ஒழிக்கப்பட்டுள்ளது – சட்டபூர்வமாக (நடைமுறை சங்கதியோ வேறு – மகா வெட்கக்கேடு!)

இன்னமும் ‘‘ஜாதி’’ ஒழிக்கப்படவில்லை; ‘ஜாதி’  (Caste)   என்னும் சொல் இந்திய அரசமைப்புச் சட்டத்தில் 18 இடங்களில் இடம்பெற்றுள்ளது என்பதை எவரே அறிவர்!

2. ‘ஜாதி’ பார்த்துத்தானே இன்னமும் திருமணங்கள் (இந்து மத முறையில்) நடைபெறுகின்றன.  Matrimonial   என்கிற ‘மணமக்கள் தேவை’ விளம்பரங்களில் – எங்கோ ஒன்றில்தான்  ‘Caste No Bar’ – ‘ஜாதி’ ஒரு பிரச்சினை இல்லை’ என்ற சொற்றொடர் உண்டு.

3. தேர்தல்களில் வேட்பாளர்கள் தேர்வு முதல் வெற்றி வரை ஜாதி அம்சங்கள் படமெடுத்தாடவில்லையா?

பார்ப்பனர்களின் இரட்டை வேடம்

4. ஏதோ முற்போக்காளர்களைப்போல சில பார்ப்பனத் திருமேனிகளே, இரட்டைக் குரல் – இரட்டை வேடம் போடுவார்கள்; அந்த ‘பிரகஸ்பதிகளை’க் கேட்கிறோம்.

‘‘உங்கள் முதுகில் ஜாதிச் சின்னமான பூணூல் தொங்காமல் உள்ளதா?’’

உங்கள் வீட்டில் – குடும்பத்தில் எத்தனை ஜாதி மறுப்புத் திருமணங்கள்? அவர்களைப் பார்த்துக் கெட்டுப்போன ‘‘சூத்திரர்களோ’’, ஜாதி ஜாதியென்று மாய்ந்து விடுகிறார்களே!

‘பிராமணர் சங்கம்’ , ‘பிராமண் சம்மேஜம்’, ‘பிராமணா தொழில் முனையம்’ மாநாடுகளை நாட்டில் நடத்திடவில்லையா?

எனவே, இட ஒதுக்கீடு – சமூகநீதி நிலைநாட்டப்படுவதை எதிர்ப்பதற்கு மட்டும்தான் உங்களுக்கு ‘‘ஜாதி ஒழிப்பு – முற்போக்கு’’ப் பார்வையா?

எனவே, தமிழ்நாடு அரசும் தனது நிலைப்பாட்டில், மக்கள் தொகைக் கணக்கெடுப்பில் ஜாதி வாரியான அளவீடு முக்கியம் என்பதை வற்புறுத்திடவேண்டும்.

ஜாதியை ஒழிக்க சட்டம் கொண்டு வரட்டுமே – பார்க்கலாம்!

மத்திய அரசு நாளைக்கு ஜாதியை ஒழிக்க ஒரு அவசரச் சட்டம் கொண்டு வந்து நிறைவேற்றினால் பிறகு இதை வற்புறுத்தமாட்டோம் என்று கூற நாங்கள் தயார், மற்றவர்கள் தயாரா?

கி.வீரமணி

ஆசிரியர்

 

ஜாதிவாரி கணக்கெடுப்பின் பலன்

 Viduthalai  November 09, 2023  தலையங்கம்,

பீகாரில் நடத்தப்பட்ட ஜாதிவாரி கணக்கெடுப்பின் தரவுகள் கடந்த மாதம் வெளியிடப்பட்டது. அதில் மாநிலத்தின் மொத்த மக்கள்தொகையில் இதர பிற்படுத்தப்பட்ட வகுப்பினர்  மற்றும் மிகவும் பிற்படுத்தப்பட்ட வகுப்பினர்  63 விழுக்காடு இருப்பது தெரியவந்தது. அதேபோல் உயர்ஜாதி மக்கள் 10 விழுக்காடும் பட்டியலின வகுப்பினர் (எஸ்.சி.) 19.65 விழுக்காடும் பழங்குடியினர் (எஸ்டி) 16.8 விழுக்காடும் இருப்பதாக தெரிவிக்கப்பட்டது.

இதையடுத்து ஜாதிவாரி கணக்கெடுப்பின் தரவுகள் குறித்து மாநிலத்தின் ஆளும் கட்சியான அய்க்கிய ஜனதா தளம் மீது பா.ஜ.க. பல்வேறு குற்றச்சாட்டுகளை சுமத்தி வருகிறது. இந்நிலையில் மாநிலத்தில் நடைபெற்று வரும் குளிர்கால சட்டப்பேரவை கூட்டத்தொடரில் ஜாதிவாரி கணக்கெடுப்பு குறித்த விரிவான அறிக்கையை மாநிலத்தின் பேரவை விவகாரங்கள் துறை அமைச்சர் விஜய்குமார் சவுதரி சமர்ப்பித்தார்.

அறிக்கையின்மீது நடைபெற்ற விவாதத்தின்போது முதலமைச்சர் நிதீஷ்குமார் பேசியது: "இதர பிற்படுத்தப் பட்ட வகுப்பினார், மிகவும் பிற்படுத்தப்பட்டோர், பட்டிய லினத்தவர்கள், பழங்குடியினர்கள்  உள்ளிட்டோருக்கு வழங்கப்படும் 50 விழுக்காடு இடஒதுக்கீட்டை 65 விழுக்காடாக  உயர்த்துவதே என் விருப்பம். இதுகுறித்து அனைத்து தரப்பினரிடமும் கலந்தாலோசித்து விரைவாக முடிவெடுக்கப்பட்டு நடப்புப் பேரவைக் கூட்டத் தொடரிலேயே சட்டம் இயற்ற வழிவகை செய்யப்படும்.

 மேலும் வறுமையிலுள்ள 94 லட்சம் குடும்பங்களுக்கு தலா ரூ.2 லட்சம் வழங்கவும் அவர்களின் வாழ்வாதாரத்தை உறுதி செய்யவும் அரசு திட்டமிட்டு வருகிறது. இத்தருணத்தில் பீகாருக்கு சிறப்பு தகுதியை வழங்குமாறு ஒன்றிய அரசிடம் மீண்டும் முன்மொழிகிறேன்.

வருகின்ற மக்களவைத் தேர்தலில் ‘இந்தியா’ கூட்டணி வெற்றிபெற்று ஆட்சி அமைத்தால் பின்தங்கிய மாநிலங்களுக்கு சிறப்பு தகுதி வழங்கப்படும் என உறுதியளிக்கிறேன்" என்றார் பீகார் முதலமைச்சர்.

ஜாதிவாரி கணக்கெடுப்பு எடுக்கப்பட வேண்டும் என்று ஒன்றிய அரசை பல மாநில அரசுகளும் வற்புறுத்தி வந்தும், ஒன்றிய பி.ஜே.பி. அரசு அதைக் காதில் போட்டுக் கொள்ளவில்லை.

அதற்கு முக்கிய காரணம் அதன் பின்னணியில் உள்ளது. ஜாதிவாரி கணக்கெடுப்பு நடத்தப்பட்டால் பட்டியலின மக்கள், பழங்குடியின மக்கள், பிற்படுத்தப்பட்டோர், சிறுபான்மையினர் எத்தனை விழுக்காடு உள்ளனர். அவர்களின் கல்வி நிலை என்ன, உத்தியோக வாய்ப்பு என்ன என்ற உண்மை விவரங்கள் வெளிச்சத்திற்கு வரும்.

அந்த நிலையில் கல்வியிலும், வேலை வாய்ப் பிலும் இவர்கள் எத்தனை விழுக்காடு உள்ளனர் என்பதை அறிந்து, தங்களின் இடஒதுக்கீட்டின் விழுக்காட்டை உயர்த்த வேண்டும் என்று போர்க் கொடி தூக்குவார்களே என்ற அச்சம்தான்.

உயர் ஜாதியினர் - பார்ப்பனர்கள் தங்கள் எண் ணிக்கைக்கு மேல் எத்தனை விழுக்காடு அனுபவிக்கின் றனர் என்ற உண்மையும் தெரிந்து விடும். இது அவர்களின் ஆதிக்கத்திற்கு எதிரான மனப்பான்மையை மக்கள் மத்தியில் ஏற்படுத்தி விடுமே என்ற சூழலில்தான் ஜாதிவாரிக் கணக்கெடுப்பு என்பதை உதாசீனப்படுத்தி வருகின்றனர்.

அகில இந்திய காங்கிரசும் சமூகநீதியில் தன் குரலை அதி வேகமாக எழுப்பி வருகிறது. இந்த நிலையில் ஆப்பதனை அசைத்து விட்ட குரங்கின் நிலைக்கு ஒன்றிய பி.ஜே.பி. அரசு விழி பிதுங்கி நிற்கிறது.

2024இல் நடக்க இருக்கும் மக்களவைத் தேர்தலில் சமூகநீதி முக்கிய பிரச்சினையாக உருவெடுக்கப் போகிறது. அது பிஜேபிக்குச் சாவுமணி அடிக்கும் என்பதில் அய்யமில்லை.

ஆம் தந்தை பெரியார் இன்றைக்கு அகில இந்தி யாவுக்கும் தேவைப்படும் தலைவராகி விட்டார்.

வெல்லப் போவது பெரியார் கொள்கை -

வீழப் போவது பி.ஜே.பி.யின் சமூக அநீதிக் கொள்கை!

 

பாராட்டத்தக்கத் தலையங்கம் - வகுப்புவாரி உரிமை - மாநிலங்களின் உரிமையே!

May 12, 2021 • Viduthalai

சமூகநீதி - வகுப்புவாரி - இட ஒதுக்கீடு எனப் படும் அனைத்து உரிமைகளுக்கும் அச் சுறுத்தலான தீர்ப்பு ஒன்றை உச்சநீதிமன்றம் அண்மையில் வழங்கி இருக்கிறது! இதனை நாம் மிக உன்னிப்பாக கவனித்தாக வேண்டும். மராத்திய இடஒதுக்கீடு தொடர்பான சட்டம் அது என்று நாம் அதனை கண்டுகொள்ளாமல் இருந்துவிட முடியாது.

மகாராஷ்டிரா மாநிலத்தில் மராத்த்ய்ஹா சமூகத்தினருக்கு கல்வி வேலை வாய்ப்பில் 16 சதவிகித இட ஒதுக்கீடு அளிக்கும் வகையில் 2018 ஆம் ஆண்டு புதிய சட்டம் நிறைவேற்றப்பட்டது. அதை எதிர்த்து மும்பை உயர்நீதிமன்றத்தில் வழக்குத் தொடரப்பட்டது. மும்பை உயர்நீதிமன்றம் இந்த சட்டத்தை ஏற்றுக் கொண்டது. ஆனால், சில திருத்தம் செய்தது. மராத்தா சமூகத்தினருக்கு வேலைவாய்ப்பில் 12 சதவிகிதமும், கல்வியில் 13 சதவிகிதமும் வழங்கலாம், 16 சதவிகிதம் என்பது அதிகம் என்று தீர்ப்பளித்தது.

இந்த தீர்ப்பை எதிர்த்து உச்சநீதிமன்றத்தில் சிலர் மனு தாக்கல் செய்தார்கள். மகாராஷ்டிரா மாநில அரசு பிறப்பித்துள்ள சட்டமானது உச்சநீதிமன்றம் ஏற்கெனவே நிர்ணயித்துள்ள 50 சதவிகித இட ஒதுக்கீட்டின் வரம்பை மீறுவதாக உள்ளது என்று அதில் குறிப்பிட்டு இருந்தார்கள்.

இந்த வழக்கை நீதிபதி அசோக் பூஷண் தலைமையிலான 5 பேர் கொண்ட உச்சநீதிமன்ற அமர்வு விசாரித்தது. இந்த அமர்வு கடந்த மே 5ஆம் தேதி தீர்ப்பளித்தது. மராத்தியர்களுக்கான இட ஒதுக்கீடு செல்லாது என தீர்ப்பளித்துள்ளது. மராத்திய இடஒதுக்கீடு சட்டம் 50 விழுக்காட்டிற்கு மேல் இருப்பதாலும், மண்டல் வழக்கில் 9 நீதிபதிகள் வழங்கிய தீர்ப்பில் குறிப்பிட்டிருந்தபடி, 50 விழுக் காட்டிற்கு மேற்பட்டு இட ஒதுக்கீடு அமையுமானால், அது தனி விதி விலக்குக்குரியது என்பதை - போதிய ஆதாரத்துடன் விளக்குவதாக இருந்தால் மட்டுமே அனுமதிக்கலாம் என்ற நிபந்தனைக்கு உகந்ததாக மராத்திய ஒதுக்கீடு அமையவில்லை என்று கூறி, அது செல்லாது என்று தீர்ப்பளித்துள்ளது. இன்று மராத்தாவுக்கு வந்தது. நாளை நமக்கும் வரலாம். எவருக்கும் வரலாம்.

அனைத்து மாநிலங்களும் 50 சதவிகித இடஒதுக்கீட்டை தாண்டக் கூடாது என்ற இந்திரா சகானி வழக்கின் தீர்ப்பை மறுபரிசீலனை செய்ய பெரிய அமர்வுக்கு அனுப்ப இந்நீதிபதிகள் ஒருமனதாக மறுத்துவிட்டார்கள். தமிழகத்தில் 69 சதவிகித இட ஒதுக்கீடு - சட்ட அங்கீகாரத்தோடு - அதற்கான வலிமையோடு இருந்தாலும் இந்தத் தீர்ப்பை நாம் சாதாரணமாகக் கடந்து போய்விட முடியாது. கூடாது.

இந்தத் தீர்ப்பின் போது இன்னொரு ஆபத்தும் வெளிப்பட்டுள்ளது. அதுதான், இனி பிற்படுத்தப் பட்டோருக்கான இட ஒதுக்கீடு வழங்கும் உரிமை மாநில அரசுகளுக்குக் கிடையாது என்பதாகும். இது மட்டும் நிறைவேறினால் இந்தியா முழுவதும் இருக்கிற பிற்படுத்தப்பட்ட மக்கள் தங்கள் உரிமை களை இழந்து மிகமிக பின்னுக்குத் தள்ளப்படு வார்கள்.

இனி, பிற்படுத்தப்பட்டோருக்கு இட ஒதுக்கீடு செய்யும் உரிமை மாநில அரசுகளுக்குக் கிடையாது; காரணம் அந்த அரசமைப்புச் சட்டத் திருத்தம்

102-இல் உள்ள 342-ஏ என்ற புதிதாக இணைக்கப் பட்ட பிரிவு, ‘சமூக ரீதியாகவும், கல்வி ரீதியாகவும்' பிற்படுத்தப்பட்டவர்கள் யார் என்பதை அடை யாளம் கண்டு சேர்க்கும் உரிமை - வரையறை செய்வது நாடாளுமன்றத்தையும், குடியரசுத் தலை வரையுமே - அதாவது மத்திய (டில்லி) அரசினை மட்டுமே சார்ந்த ஒன்று என்பதாக பெரும்பான்மை நீதிபதிகள் தீர்ப்பளித்துள்ளனர்.

மாநிலங்கள் தீர்மானிக்க முடியாது - குடியரசுத் தலைவர் தான் தீர்மானிக்க முடியும் என்கிறது இந்தத் தீர்ப்பு. அனைத்து மாநிலங்களிலும் ஜாதி இருக்கிறது. அது ஒரே மாதிரியான ஜாதியாக இல்லை. இவர் பிற்படுத்தப்பட்ட ஜாதி - இவர் மிகவும் பிற்படுத்தப்பட்டவர் என மாநிலங்கள் தான் தீர்மானிக்க முடியும். இது மாநிலத்துக்கு மாநிலம் மாறுபடும். அதனை மாநிலங்களால் மட்டுமே அடையாளம் காண முடியும். அளவிட முடியும்.

இது தொடர்பாக திராவிடர் கழகத் தலைவர் மானமிகு ஆசிரியர் கி.வீரமணி அவர்கள் விரிவான அறிக்கை ஒன்றை வெளியிட்டுள்ளார். “இதனால் ஏற்படும் ஆபத்தான விளைவுகளும்; சமூக நீதிக்கான - மாநிலங்களின் உரிமைப் பறிப்பும் மிகவும் மோசமானதாக - இனிமேல் மாநில அரசுகள் பிற்படுத்தப்பட்டவர்களை அடையாளம் கண்டு, அதற்கேற்ப உள் ஒதுக்கீடுகள் உட்பட எதையும் கொடுப்பதற்கு எந்த உரிமையும் அற்றவைகளாகவே ஆகக் கூடும்'' என்று ஆசிரியர் கி.வீரமணி சுட்டிக் காட்டியுள்ளார்.

‘‘ஏற்கெனவே 1951 இல் தந்தை பெரியார் போராடி, பிரதமர் நேருவும், சட்ட அமைச்சர் டாக்டர் அம்பேத்கரும், நாடாளுமன்றமும் கல்வி யில் இட ஒதுக்கீடு செய்ய பிற்படுத்தப்பட்ட வர்களுக்கென - சமூகரீதியாகவும், கல்வி ரீதியாகவும், (socially and educationally) என்று அடையாளப்படுத்திய வரைமுறையைத் தந்த முதலாவது அரசமைப்புச் சட்டத் திருத்தமும், அதனால் விளைந்த அத்துணைப் பயன்களும் காணாமற் போகச் செய்யும் - பறிமுதல் செய்யும் பேராபத்தான நிலையே இன்று ஏற்பட்டுள்ளது'' - என்றும் அவர் கொந்தளித்துள்ளார். தேசிய பிற்படுத்தப்பட்டோர் ஆணையத்துக்கு சட்ட வலிமை வேண்டும் என்றும் அவர் வலியுறுத்தி உள்ளார்.

சமூகநீதி என்பது சமூகங்களின் உரிமையே தவிர, சட்ட உரிமை அல்ல. சமூகநீதி என்பது குடிமக்களின் உரிமையே தவிர, குடியரசுத் தலைவரின் உரிமை அல்ல. - இதனை நிரூபிக்க வேண்டிய சமூகநீதிக்கடமை நம் அனைவர் தலையிலும் விழுந்துள்ளது.

சமூகநீதி மட்டுமல்ல, மாநில உரிமையும், இன உரிமையும் தொடர்புடையது!

நன்றி: ‘முரசொலி' , 12.5.2021,

பக்கம் 2