பட்டியலின மக்களின் பணிகளைப் பறிப்பதா?

   May 24, 2022 • Viduthalai

போலி ஜாதிச்சான்றிதழ் கொடுத்து பணியில் சேர்ந்தவர்கள் மீது நடவடிக்கை எடுக்கக் கோரிய கருநாடக காவல்துறை தலைவரை இடமாற்றம் செய்ததால் அவர் பதவி விலகினார். 

கருநாடகாவில் காவல்துறையில் தாழ்த்தப்பட்ட மற்றும் பழங்குடி இனப்பிரிவினர் என போலியான சான்றிதழ்களை வாங்கி அதன் மூலம் நூற்றுக்கணக்கான காவலர்கள் பணியில் சேர்ந்துள்ளனர். 

அவர்கள் மூலம் காவல்துறையில் பலகோடி ரூபாய் ஊழல் பணம் கைமாறி உள்ளது எனப் புகார் வந்தது. இதனை அடுத்து பல அதிகாரிகள் இந்தப் புகார் குறித்து விசாரிக்க ஆணையிட்டும் எந்த ஒரு முன்னேற்றமும் இல்லாமல் இருந்த நிலையில், காவல்துறை தலைவர் 

பி.ரவீந்திரநாத் நேரடியாக தானே விசாரணையில் இறங்கினார். இதில் சமீபத்தில் காவல்துறையில் இட ஒதுக்கீட்டின் பிரிவில் சேர்ந்தவர்களில் 700 பேர்களின் சான்றிதழ்கள் போலியானவை என்றும், சமூகத்தில் மிகவும் உயர்ந்த ஜாதி என்று கூறிக்கொள்ளும் சிலர் கூட தாழ்த்தப்பட்டோர் என சான்றிதழ் வாங்கி காவல்துறையில் சேர்ந்திருப்பதும் தெரிய வந்தது, 

 இது குறித்த முழு அறிக்கையை அவர் மாநில முதலமைச்சர் எஸ்.ஆர்.பொம்மையிடம் சமர்ப்பித்தார். ஆனால் வியப்பிற்குரிய வகையில் தன்னுடைய வேலையில் கவனம் செலுத்தாமல் காலத்தையும், தனது பதவிக்கான கண்ணியத்தையும் காக்கத் தவறிவிட்டார் என்று கூறி மாநில அரசு அவருக்கான பல சலுகைகளை பறித்தது, முக்கியமாக அவருக்கு என்று பாதுகாப்பிற்கு இருக்கும் காவலர்களை வேறு பணிக்குச் செல்ல உத்தரவிட்டு, அவரது பாதுகாப்பிற்கு காவலர்களையும் நியமிக்காமல் விட்டுவிட்டது,  இந்த நிலையில் அவரை காவலர் பயிற்சிப்பள்ளியில் மேற்பார்வையாளர் பணிக்கு அனுப்பியது. மிகவும் உயர்ந்த பதவியில் இருந்த ஒருவர் கிட்டத்தட்ட துணை ஆய்வாளர் நிலையில் பணியாற்ற கருநாடக அரசால் நிர்பந்திக்கப்பட்டார்.  அவர் இது குறித்து ஆளுநரிடம் புகார் தெரிவித்தார். ஆனால் ஆளுநர் அரசுக்கு சாதகமாகவே நடந்து கொண்டார். இதனை அடுத்து அவர் தனது அய்.பி.எஸ். பதவியிலிருந்து விலகினார். இது தொடர்பாக கருநாடக மாநில தலைமைச் செயலாளர் ரவிக்குமாருக்கு அவர் அனுப்பிய பதவி விலகல் கடிதத்தில் குறிப்பிட்டுள்ளதாவது: 

“நான் தாழ்த்தப்பட்டோர் மற்றும் பழங்குடியினர் எனப் போலியாக சான்றிதழ்களைப் பெற்று காவல் துறையில் சேர்ந்தவர்கள் குறித்து விசாரணை நடத்த தனிக் குழு ஒன்றை நியமிக்கக் கோரியிருந்தேன், போலிச்சான்றிதழ்கள் மூலம் ஆயிரக்கணக்கானோர் காவல்துறையில் ஊடுருவி உள்ளனர். இவர்களால் எப்படி நேர்மையாக காவலர்களுக்கான சேவையை மக்களுக்குக் கொடுக்க முடியும்?

ஆனால் அரசு அக்குழுவை அமைக்க முன்வர வில்லை. நானே நேரடியாக விசாரணை செய்து 500க்கும் மேற்பட்ட போலிச்சான்றிதழ்கள் தொடர்பான சான்றுகளை அரசின் பார்வைக்கு அனுப்பினேன். அச்சான்றுகளை ஆய்வு செய்து குற்றம் செய்தவர்கள் மீது நடவடிக்கை எடுப்பதற்குப் பதிலாக என்னை அதிகாரமில்லாத பதவிக்கு மாற்றம் செய்தனர்.   இந்த நிலையில் நான் இந்தப்பதவியில் தொடர முடியாது" என்று பதவிவிலகல் கடிதத்தில் குறிப்பிட்டுள்ளார்.   சமீபத்தில் "ரூ.1200 கோடி அல்லது அதற்கு அதிகமாக கொடுத்தால் கருநாடக முதலமைச்சராக டில்லி மேலிடம் நியமிக்கும்" என்று பாஜகவின் மேனாள் அமைச்சர், தற்போதைய சட்டமன்ற உறுப்பினர் குறிப்பிட்டிருந்தார். இந்த நிலையில் மாநில காவல்துறை தலைவர் தனது கீழ் உள்ள காவல்துறையில் பல கோடிகள் ஊழல் கைமாறி போலிச்சான்றிதழ்களைப் பெற்று பணி பெற்றது  பற்றிய சான்றுகளோடு புகாரினை சமர்ப்பித்த அவரையே இடமாற்றல் செய்ததைப் பார்க்கையில் கருநாடக சட்டமன்ற உறுப்பினர் கூறியது உண்மையாக இருக்கும் என்றுதான் தெரியவந்துள்ளது. 

பிஜேபி ஆளும் ஒவ்வொரு மாநிலத்திலிருந்தும் ஊழல், மோசடிகள் என்னும் விரியன் குட்டிகள் பின்னிப் பிணைந்து புதர்களிலிருந்து சாரை சாரையாக பவனி வந்து கொண்டுள்ளன.

பட்டியலின மக்களுக்குக் கிடைக்க வேண்டிய பணிகளை, பட்டியலினத்தவர் எனப் போலிச் சான்றிதழ் பெற்று பிற ஜாதியினர் அபகரிப்பது எந்த வகையைச் சார்ந்தது?

இதுதான் ராம ராஜ்யமோ - இந்து ராஜ்யமோ! கருநாடக மாநிலத்தில் உள்ள அனைத்து சக்திகளும் ஒன்று திரண்டு எதிர்வினை ஆற்றிட வேண்டும். இல்லையெனில் ஒடுக்கப்பட்ட மக்கள் மேலும் மேலும் இழப்புகளை ஏமாற்றங்களைச் சந்திக்க நேரிடும்!

பட்டியலில் மீண்டும் கிறித்தவ நாடார் சேர்ப்பு கேரளாவில் அமைச்சரவை முடிவு

 இதர பிற்படுத்தப்பட்டோர் 

     March 02, 2022 • Viduthalai

திருவனந்தபுரம், மார்ச் 2- எஸ் அய்யுசி அல்லாத கிறித்தவ மதத்தைச் சேர்ந்த நாடார் சமூகத்தினரை மாநில இதர பிற்படுத்தப்பட்டோர் (ஓபிசி) பட்டியலில் இணைக்க கேரள அமைச்சரவை முடிவு செய்துள்ளது. 

1958இல் கேரள மாநில மற்றும் துணை விதியில் 2021 ஆகஸ்ட் 15 முதல் நடைமுறைக்கு வரும் விதமாக திருத்தம் கொண்டுவரப்படும். எஸ் அய்யுசி அல்லாத கிறித் தவ நாடார் சமூகத்தினரை இதர பிற்படுத்தப் பட்டோர் பட்டியலில் இணைத்து 2021 பிப்ரவரி 6 இல் அரசு உத்தரவு பிறப்பித்தது. இந்த உத்தரவை ரத்து செய்ய வேண்டும் எனக்கோரி தொடுக்கப்பட்ட வழக்கில் அரசு உத்தரவுக்கு உயர்நீதிமன்றம் தடை விதித்தது. 

அரசமைப்பு சாசனத் தின் 127 ஆவது திருத்த மசோதா நாடாளுமன்றத்தில் நிறைவேற்றப்பட்டதைத் தொடர்ந்து, சமூகத்தில் பின்தங்கிய நிலையில் உள்ள சமூகத்தினரை பிற்படுத்தப்பட்டோர்  பட்டியலில் இணைப்பதற்கான அதிகாரம் மாநில அரசுகளுக்கு மீண்டும் வழங்கப்பட்டது.

இந்த சூழ்நிலையில் கேரள அமைச்சரவை 25.2.2022 அன்று இந்த முடிவை மேற்கொண்டது.

தந்தை பெரியார் பிறந்த நாளை சமூகநீதி நாளாக அறிவித்ததுபோல - அண்ணல் அம்பேத்கர் பிறந்த நாளை சமத்துவ நாளாக அறிவித்தது பாராட்டத்தக்கது!

  April 14, 2022 • Viduthalai

'சமூகநீதிக்கான சரித்திர நாயகர்' நமது முதலமைச்சர் என்பதற்கு அடையாளம்!

தமிழர் தலைவர் ஆசிரியர்

தந்தை பெரியார் பிறந்த நாளை சமூகநீதி நாளாக அறிவித்ததுபோலவே, அண்ணல் அம்பேத்கர் பிறந்த நாளை சமத்துவ நாளாக அறிவித்தது, திராவிட இயக்க சாதனை மகுடத்தில் சமூகநீதிக் கான சரித்திர நாயகர் முதலமைச்சர் மானமிகு மாண்புமிகு மு.க.ஸ்டாலின் அவர்கள் பதித்த மற்றொரு முத்தே என்று  திராவிடர் கழகத் தலைவர் தமிழர் தலைவர் ஆசிரியர் கி.வீரமணி அவர்கள் அறிக்கை விடுத் துள்ளார். அவரது அறிக்கை வருமாறு:

தமிழ்நாட்டின் ஒப்பற்ற முதலமைச்சரான 'சமூகநீதிக் கான சரித்திர நாயகர்' மு.க.ஸ்டாலின் அவர்கள், புரட்சியாளர் டாக்டர் பி.ஆர்.அம்பேத்கர் அவர்களின் பிறந்த நாளை (14.4.2022) தமிழ்நாடு அரசு சமத்துவ நாளாக இனி கொண்டாடும் என்று நேற்று (13.4.2022) சட்டப்பேரவையில் அறிவித்திருப்பது, தித்திக்கும் தேன் போன்ற வரவேற்கப்படவேண்டிய வரலாற்று சிறப்பு மிகுந்த பிரகடனமாகும்.

அண்ணல் அம்பேத்கருக்குத்

தமிழ்நாடு அரசு செய்துள்ள சிறப்பு!

பகுத்தறிவுப் பகலவன் தந்தை பெரியார் பிறந்த நாளான செப்டம்பர் 17 ஆம் தேதியை சமூகநீதி நாளாக அறிவித்து, உறுதிமொழி ஏற்கச் செய்து, ஓர் அமைதிப் புரட்சிப் பொன்னேட்டை, திராவிட மாடல் ஆட்சியின் வரலாற்றில் இணைத்தார்.

நேற்று அறிவித்திருக்கும் அறிவிப்பு மிகவும் பாராட்டி - வரவேற்கப்படும் - திராவிட இயக்க சாதனை மகுடத்தில் மற்றுமோர் ஒளிமுத்தே!

காரணம், தந்தை பெரியாரும், டாக்டர் அம்பேத்கரும் புரட்சிக் கருத்துகள், சமத்துவ இலட்சியங்களுக்காகப் போர் புரிந்து, போராயுதங்களைத் தரும் அறிவாயுதத் தொழிற்சாலைகள்.

ஒரே (கொள்கை) நாணயத்தின் இரண்டு பக்கங்கள்.

டாக்டர் அம்பேத்கர் பேசப்படாத ஜாதி ஒழிப்பு மாநாட்டின் தலைமையுரையை, 1936-லேயே உரிமை பெற்று, தமிழிலேயே வெளியிட்டு, அம்பேத்கரை தமிழ்நாடு அறிந்து, வியந்து பாராட்டும்படி செய்தவர் தந்தை பெரியார்.

மும்பையில் தந்தை பெரியார் தலைமையில், அண்ணல் அம்பேத்கர் உரையாற்றினார். அப்பொழுது தந்தை பெரியாரின் தமிழ் உரையை ஆங்கிலத்திலும், அண்ணல் அம்பேத்கரின் ஆங்கில உரையைத் தமிழிலும் மொழி பெயர்த்தவர் அறிஞர் அண்ணா என்பது குறிப்பிடத்தக்க கூடுதல் செய்தியாகும்.

தமிழ்நாட்டில் அம்பேத்கர் பெயரில் கல்லூரி - சட்டப் பல்கலைக் கழகம்

அம்பேத்கர் பெயரில் சென்னை வியாசர்பாடியில் அரசு கல்லூரி அமைத்தவர் நமது முத்தமிழ் அறிஞர் கலைஞர். பிறகு அம்பேத்கர் பெயரில் தமிழ்நாடு சட்டப் பல்கலைக் கழகம் தலைநகர் சென்னையில்!

அம்பேத்கர் பிறந்த மண்ணில் அவர் பெயரை ஒரு கல்லூரியில் இணைத்தமைக்காக கடுமையான எதிர் போராட்டம் நடந்தது; தமிழ்நாட்டிலோ பலத்த வரவேற்பு. இதுதான் பெரியாரின் சமூகநீதி மண்ணின் தனிச்சாதனை; திராவிட மாடல் ஆட்சியின் இலட்சியங்களை இலக் காக்கிய சுயமரியாதை பூமியின் தனித்தன்மை!

தந்தை பெரியார் தம் வாழ்நாளில், அதிக தடவை சந்தித்த தலைவர் டாக்டர் அம்பேத்கர் அவர்களே!

தமிழ்தான் இந்தியா முழுவதிலும் பரந்து இருந்த மொழி - நாகர்களின் மொழி என்று ஆய்வுடன் எழுதிய வர் அண்ணல் அம்பேத்கர்.

பர்மாவில் உலகப் பவுத்தர்கள் மாநாட்டில்

தந்தை பெரியாரும் - அண்ணல் அம்பேத்கரும்!

1953 ஆம் ஆண்டு பர்மாவில் தந்தை பெரியாரும், டாக்டர் அம்பேத்கரும் ஒன்றாக உலக பவுத்தர்கள் மாநாட்டில் கலந்துகொண்டனர். அப்போதுதான் டாக்டர் அம்பேத்கர் பவுத்தம் தழுவுவதற்கான முடிவின் இறுதி வடிவத்தை தந்தை பெரியாரிடம் கூறியபோது,

''நீங்கள் பெருங்கூட்டத்துடன் சேருங்கள்'' என்று யோசனை கூறியவர் தந்தை பெரியார்.

நாகபுரியில் 5 லட்சம் பேருடன் பவுத்த நெறிக்கு மாறினார் அம்பேத்கர் என்பது வரலாற்றுச் சுவடுகள்!

மனுதர்மத்தை எரித்த இருவரும் சமத்துவத்துக்காக - பெண்ணுரிமைக்காகப் பாடுபட்ட போராளிகள் - இருபெரும்  தத்துவத் தலைவர்கள்!

அதனால் அந்தச் சுடரை அணையாது கொண்டு செல்கிறார் தமிழ்நாட்டின் திராவிட மாடல் ஆட்சி சிம்மாசனத்தில் அமர்ந்துள்ள நமது முதலமைச்சர்.

வருணாசிரம வேரை நறுக்கச் சொன்னவர் அண்ணல் அம்பேத்கர்

ஜாதியை ஒழிக்க அதன் ஆணிவேரான வர்ணதர்மம், சனாதன அடிபீடத்தை நொறுக்கச் சொன்னவர் டாக்டர் அம்பேத்கர்.

அவரது பிறந்த நாளை சமத்துவ நாளாகக் கொண் டாட அறிவித்திருப்பது அர்த்தமுள்ளது. அனைத்துத் தரப்பு ''அடிமை வகுப்பினரான'' (''Servile Classes'')  எஸ்.டி., எஸ்.சி., ஓ.பி.சி., அனைத்து ஒடுக்கப்பட்ட மக் களையும் ஒன்றுபடுத்தி - சமப்படுத்தி இணைத்துக் கூறும் அரிய சொற்றொடர் இது.

‘‘ஜாதியை, ஜாதி தர்மத்தைப் பரப்பிடும் மத நூல் களான இராமாயணமும், கீதையும் சமத்துவத்திற்கு எதி ரான நூல்களே!’’ என்று துணிவுடன் - தந்தை பெரியார் போன்று அன்றே பேசிய, எழுதிய, அறிவு நாணயம் மிகுந்த தலைவர்.

‘திராவிட மாடல்’ ஆட்சி இதுதான்!

திராவிடர் இயக்கத்தின் ஜாதி ஒழிப்பு, சுயமரியாதை, சமத்துவம், பகுத்தறிவு, சமூகநீதி என்பது வெறும் நீர் எழுத்துகள் அல்ல; பாறையின் செதுக்கல்; லட்சியப் பயணத்தின் தொய்வில்லா சாதனை என்பதை நமது முதலமைச்சரின் இந்த அறிவிப்பு நிரூபித்து, திராவிட மாடல் ஆட்சியின் மாண்பை மலை உச்சி விளக்கொளி ஆக்கிக் காட்டுகின்றது.

கி.வீரமணி 

தலைவர்,

திராவிடர் கழகம்

சென்னை       

14.4.2022            

இதர பிற்படுத்தப்பட்டவர்களுக்கான உரிமைகளை ஒன்றிய அரசு புறக்கணிக்கிறதா?

  March 30, 2022 • Viduthalai

 மாநிலங்களவையில் தி.மு.க. உறுப்பினர் பி.வில்சன்

புதுடில்லி, மார்ச் 30- இதர பிற்படுத்தப் பட்ட மக்களுக்கு உள்ளாட்சித் தேர்தலில் இடஒதுக்கீட்டை 1992ஆம் ஆண்டே அரசமைப்புச் சட்டத்தில் கொண்டுவந்தும், 28 ஆண்டுகளுக்கு மேல் ஆகியும் நடைமுறைப்படுத்தப்படாததால் அதில் உள்ள சிக்கல்களை நீக்க வேண்டும் என்று மாநிலங்களவை யில் திமுக உறுப்பினர் பி.வில்சன் வலியுறுத்தினார். இது தொடர்பாக அவர் கூறியதாவது:

அய்யா நமது அரசமைப்புச் சட்டம் இதர பிற்படுத்தப்பட்ட மக் களுக்கான உள்ளாட்சித் தேர்தலுக் கான இட ஒதுக்கீட்டை 1992 ஆம் ஆண்டே கொண்டுவந்துவிட்டது, ஆனால் 28 ஆண்டுகளுக்கு மேல் ஆகியும் இன்றும் அது நடை முறைப்படுத்தப்படவில்லை.

மார்ச் 2011 இல், 15வது மக்கள வையில் தாழ்த்தப்பட்ட பழங்குடியின மக்கள் தவிர இதர அனைத்து ஜாதிகளின் மக்கள்தொகை கணக் கெடுப்பை உள்ளடக்கிய சமூக பொருளாதார  ஜாதிவாரிக் கணக் கெடுப்பை மேற்கொள்வதற்கான தீர்மானத்தின்படி,

மத்திய அமைச்சரவை, மாநிலங் கள்/யூனியன் பிரதேசங்களின் உத வியுடன் ஜாதிவாரி கணக்கெடுப்பை நடத்த வேண்டும். இதற்காக 4693.60 கோடி நிதியும் ஒதுக்கப்பட்டது.

இந்தக்கணக்கெடுப்பின் மூலம் ஜாதித் தரவு 2015 ஆம் ஆண்டில் ஒன்றிய அரசால் சேகரிக்கப்பட்டது மற்றும் மாண்புமிகு பிரதமர் தலை மையிலான அமைச்சரவையின் முன் வைக்கப்பட்டது.

 அந்த புள்ளிவிபரங்களை சிறந்த ஆய்வுக்குழுவினரைக் கொண்டு நிதி ஆயோக் அதை நிறைவேற்றும் முறைகள் குறித்து வழிகாட்ட அனுப்பட்டது.  இன்று வரை அது என்ன ஆனது என்றே தெரிய வில்லை. அது குறித்து பேசவே மறுக்கின்றனர். 

  உச்ச நீதிமன்றம் உள்ளாட்சித் தேர்தல்களில் இதர பிற்படுத்தப்பட மக்கள்தொகை குறித்த புள்ளி விபரங்கள் கிடைக்கும் போது மட் டுமே வழங்கப்பட முடியும் என்றும், அதற்கான ஆணையம் அதை அங்கீகரிக்கும் போது மட்டுமே வழங்க முடியும் என்றும் கூறி யுள்ளது.

இது ஒரு அரசமைப்பு சிக்கலை உருவாக்கி உள்ளது 20.12.2021 தேதியிட்ட செய்திக்குறிப்பு மூலம் உள்ளாட்சி அமைப்புகளில் இதர பிற்படுத்தப்பட்டவகுப்பினருக்கு அரசியல் இடஒதுக்கீட்டை அனு மதிக்க மறுஆய்வு மனு தாக்கல் செய்வதாக ஒன்றிய அரசு தெரிவித்தது, ஆனால் இன்று வரை அவ்வாறு செய்யவில்லை.

ஒருபுறம் அரசியலமைப்பு இதர பிற்படுத்தப்பட்ட மக்களுக்கான இடஒதுக்கீடுகளை வழங்குகிறது,

ஒருபுறம் உரிமைகளுக்கன கதவு களைத் திறந்துவைத்துகொண்டே மறுபக்கம் அதற்கான தரவுகளைக் கொண்ட புள்ளிவிபரங்களை வெளியிட மறுக்கிறது, அதில் கூட அரசியல் லாபம் கிடைக்காதா என்று பார்க்கிறது.

 இதனால் மாநில அரசுகள் தங்களின் அரசமைப்புப் கடமை களை அம்மக்களுக்கு செய்ய இய லாத சூழல் நிலவுகிறது. நீதிமன்றங் களும் மாநிலங்களில் நடவடிக்கை களுக்கு முட்டுக்கட்டை போடும் சூழல் உள்ளது. மாநில அரசுகள் செயல்படும் போது நீதிமன்றம் மூலம் தடையாணை பெற்று மாநில அரசுகளில் செயல்பட்டை முடக் குவதுதான் ஒன்றிய அரசின் நோக் கமா?  மாநில அரசுகள் மக்கள் தொகை கணக்கெடுப்பை நடத்த முடியாது, அப்படி நடத்த முன் வந்தாலும் நீதிமன்றம் அதற்கு இடமளிக்காது.

 ஏனெனில் மக்கள் தொகை கணக்கெடுப்பு என்பது ஒன்றிய அரசின் கடமையாக அரசியலமைப் பின் 7 கூறப்பட்டுள்ளது.

எனவே, ஜாதிவாரிக் கணக் கெடுப்பு 2011 இன் மக்கள் தொகைக் கணக்கெடுப்புத் தரவை  வெளியிடுவதன் மூலமோ அல்லது சட்டப்பிரிவு 243(ஞி)(6) க்கு திருத்தம் கொண்டு வருவதன் மூலமோ இட ஒதுக்கீட்டில் உள்ள அரசியலமைப்பு சிக்கலில் இருந்து மீள வழிசெய்யு மாறு பிரதமருக்கு அவையின் மூலம் நான் மனப்பூர்வமாக வேண்டு கோள் விடுக்கிறேன்.

பிரிவு 243  (T)(6) 342A(3) இன் கீழ் மாநிலங்களால் சேகரிக்கப்பட்ட புள்ளிவிபரங்களின் அடிப்படையில் உள்ளாட்சித் தேர்தல்களில் இதர பிற்படுத்தப்பட்ட மக்களுக்கு இட ஒதுக்கீடுகளை கட்டாயமாகிறது இதன் மூலம்  உள்ளாட்சி மட்டத் தில் சமூக நீதியை நிலைநிறுத்தப்படும் இதன் மூலம் அம்மக்களுக்கு நீதி கிடைக்கும். ஒன்றிய அரசு இதைக் கவனத்தில் கொண்டு விரைந்து செயல்படவேண்டும் என்று கூறிக் கொள்கிறேன்

வன்னியர்களுக்கான 10.5 சதவீத இட ஒதுக்கீடு சட்டம் ரத்து

  November 01, 2021 • Viduthalai

உயர்நீதிமன்ற மதுரை கிளை தீர்ப்பு

மதுரை, நவ.1 வன்னியர்களுக்கு 10.5 சதவீத உள் இடஒதுக்கீடு வழங்கி தமிழ்நாடு அரசு பிறப்பித்த அரசாணையை ரத்து செய்து மதுரை உயர்நீதிமன்றம் உத்தரவு பிறப்பித்துள்ளது.

ராமநாதபுரம் மாவட் டம் பரமக்குடியை சேர்ந்த பாலமுரளி, மதுரை உயர் நீதிமன்றத்தில் தாக்கல் செய்த பொதுநல மனு வில், தமிழ்நாட்டில் மிக வும் பிற்படுத்தப்பட்ட சமுதாயத்தைச் சேர்ந்த மக்கள் ஏராளமானவர் கள் உள்ளனர்.

இவர்களுக்கு மொத்த மாக 20 சதவீதம் இட ஒதுக்கீடு அளிக்கப்பட் டுள்ளது. இதில் 10.5 சதவீ தத்தை வன்னியர் சமுதா யத்தினருக்கு உள்ஒதுக் கீடாக வழங்கி கடந்த பிப்ரவரி மாதம் தமிழ்நாடு அரசு சட்ட மசோதாவை நிறைவேற்றியது.

இதனால் மிகவும் பிற் பட்ட வகுப்பினர் பிரிவில் உள்ள பிற சமுதாயத்தை சேர்ந்த மக்களின் கல்வி, வேலை, எதிர்காலம் அனைத்தும் கேள்விக் குறியாகிவிட்டது. முறை யாக ஜாதிவாரிக் கணக் கெடுப்பு நடத்திய பின் னரே இட ஒதுக்கீடு வழங்க வேண்டும்.

எனவே, வன்னிய சமுதாயத்தினருக்கு 10.5 சதவீதம் உள் இட ஒதுக் கீடு வழங்கும் சட்டத்தை ரத்து செய்து, அதன் அடிப்படையில் கல்வி நிறு வனங்கள் மற்றும் வேலை வாய்ப்புகளில் இட ஒதுக் கீட்டை அமல்படுத்த இடைக் கால தடை விதித்து உத்தரவிட வேண்டும் என்று கூறியிருந்தார்.

இதே கோரிக்கையுடன் 20-க்கும் மேற்பட்டோர் மனு தாக்கல் செய்திருந் தனர். இந்த மனுக்களை சென்னை உயர்நீதிமன்ற தலைமை நீதிபதியின் பரிந்துரையின்பேரில் நீதிபதிகள் துரைசாமி, முரளிசங்கர் ஆகியோர் ஆகியோர் கடந்த சில வாரங்களாக மதுரை உயர்நீதிமன்றத்தில் நாள் தோறும் விசாரித்தனர்.

விசாரணையின் போது மனுதாரர்கள் சார்பில் ஆஜரான வழக் குரைஞர்கள், மிகவும் பிற்படுத்தப்பட்டோருக் கான இட ஒதுக்கீட்டில் 10.5 சதவீதத்தை வன்னி யர்களுக்கு வழங்கி இருப் பது, சட்டத்துக்கு முர ணான இட ஒதுக்கீடாக உள்ளது.

ஜாதி ரீதியான கணக் கெடுப்புகள் முறையாக நடத்தப்படவில்லை. தேர்தல் ஆதாயத்திற்காக ஒரு சமுதாயத்தினரை முன்னிறுத்தி சட்டமன் றத்தில் இந்த தீர்மானம் அவசர அவசரமாக கொண்டு வரப்பட்டு நிறைவேற்றப் பட்டுள்ளது.

இந்த தீர்மானத்தால் மிகவும் பிற்படுத்தப்பட் டோர் இட ஒதுக்கீட்டில் உள்ள மற்ற ஜாதி மாண வர்கள் கடுமையாக பாதிக்கப்பட்டுள்ளனர் என்று வாதாடினர். அரசு தரப்பிலும் சட்டத்தின் நியாயத்தை எடுத்துரைத் தனர். பின்னர் இந்த வழக் கின் தீர்ப்பை கடந்த வாரம் நீதிபதிகள் ஒத்தி வைத்து இருந்தனர்.

இந்தநிலையில் இன்று (1.11.2021) காலை யில் அதே நீதிபதிகள் இந்த வழக்கின் தீர்ப்பை வழங்கினர். அதில் கூறியிருந்ததாவது:-

மிகவும் பிற்பட்டவர் களுக்கான இட ஒதுக்கீட் டில் உள்ஒதுக்கீடாக வன் னியர்களுக்கு 10.5 சதவீ தத்தை ஒதுக்க மாநில அர சுக்கு அதிகாரம் உள்ளதா?

ஜாதிவாரி கணக்கெ டுப்பு நடத்தப்படாத சூழ் நிலையில் இது போன்ற அரசாணை பிறப்பிக்க லாமா? ஜாதி அடிப்படை யில் இடஒதுக்கீடு வழங்க முடியுமா? முறையான அளவுசார் தரவுகள் இல்லாமல் இடஒதுக்கீடு வழங்க இயலுமா? என் பது உள்ளிட்ட பல்வேறு கேள்விகள் எழுகிறது.

இந்தக் கேள்விகளுக்கு தமிழ்நாடு அரசு அளித்த பதில்கள் ஏற்றுக் கொள் பவையாக இல்லை. இந்த அரசாணை அரசமைப்பு சட்டங்களுக்கு எதிரான தாக உள்ளது.

எனவே வன்னியர் களுக்கு 10.5 சதவீத உள் இடஒதுக்கீடு வழங்கும் வகையில் தமிழ்நாடு அரசு பிறப்பித்த அரசாணை மற்றும் நடவடிக் கைகள் ரத்து செய்யப்படுகின்றன.

இந்த அரசாணையின் அடிப்படையில் பள்ளி, கல்லூரிகள் மற்றும் அர சுப்பணிகளில் உள்இட ஒதுக்கீடு வழங்கப்பட்டு இருக்குமாயின் அவை நிறுத்தி வைக்கப்படுகின் றன. இந்த உத்தரவுக்கு எதிராக மேல்முறையீடு செய்ய அனுமதிக்கப்படு கிறது. இவ்வாறு நீதி பதிகள் உத்தரவில் கூறி யுள்ளனர்.

27 சதவிகித இட ஒதுக்கீட்டில், தி.மு.க. வெற்றி பெற்றது - இந்தியா முழுவதும் அதனுடைய பலன் கிடைத்தது! - தமிழர் தலைவரின் சிறப்புரை

   February 17, 2022 • Viduthalai

உச்சநீதிமன்றத்தின் வரலாறு படைத்த தீர்ப்பு: தமிழர் தலைவரின் சிறப்புரை

சென்னை, பிப்.17   27 சதவிகித இட ஒதுக்கீட்டில், தி.மு.க. வெற்றி பெற்றது - இந்தியா முழுவதும் அதனுடைய பலன் கிடைத்தது என்று சாதாரணமாக நினைக்கிறார்கள். ''வெற்றிக்குப் பல கதாநாயகர்கள் உண்டு. யார் காரணம் என்றால், நாங்கள்தான் காரணம் என்று பி.ஜே.பி.,க்காரர்களும்கூட இப்பொழுது வரு கிறார்கள். இதுதான் விசித்திரம்! என்றார்   திராவிடர் கழகத் தலைவர் தமிழர் தலைவர் ஆசிரியர் கி.வீரமணி  அவர்கள்.

உச்சநீதிமன்றத்தின் வரலாறு படைத்த தீர்ப்பு

கடந்த 1.2.2022 அன்று மாலை  ‘‘உச்சநீதிமன்றத்தின் வரலாறு படைத்த தீர்ப்பு'' என்ற தலைப்பில் காணொலி கூட்டம் நடைபெற்றது. அக்கூட்டத்தில் திராவிடர் கழகத் தலைவர் தமிழர் தலைவர் ஆசிரியர் கி.வீரமணி சிறப்புரையாற்றினார்.

அவரது சிறப்புரை வருமாறு:

இந்நிகழ்விற்கு வரவேற்புரையாற்றிய  கழக வழக்குரைஞரணி தலைவர் மூத்த வழக்குரைஞர் மானமிகு த.வீரசேகரன் அவர்களே,

இந்நிகழ்வில் சிறப்பான முறையில் ஒரு வரலாற்றை எடுத்துக்கூறி, என்னுடைய உரைக்குமுன் ஒரு பீடிகை போல,  அறிமுக உரை போல அருமையான ஓர் உரையை ஆதாரப்பூர்வமாக சிறப்பாக எடுத்து வைத்த கழக வெளியுறவுத் துறை செயலாளரும், அகில இந்திய  பிற்படுத்தப்பட்டோர்  கூட்டமைப்பி னுடைய பொதுச்செயலாளருமான அன்பிற்குரிய சகோதரர் கருணாநிதி அவர்களே,

'புதிய சிறகுகள்'  தோழர் சிவராஜ்

'புதிய சிறகுகள்' என்ற பெயராலே நல்ல ஆக்கப் பணிகளை செய்து, நம்முடைய இளைஞர்களையெல் லாம் ஒன்று திரட்டி, அவர்களுக்கு வெறும் வேலை வாய்ப்புக்கான பயிற்சி என்பதைவிட, வாழ்க்கைக் கான பயிற்சிக்குப் பெரியார்தான் அடிப்படை என் பதற்கு - நம்முடைய அறிவாசான் தந்தை பெரியார் அவர்களுடைய கொள்கைகளை ஊட்டி, தன்மான மும், தன்னம்பிக்கையும் நிறைவேறினால், தன்னி றைவு  தானே வந்து கதவைத் தட்டும் என்ற பால பாடத்தை அந்த இளைஞர்கள் மத்தியிலே சிறப்பாக செய்த அருமைத் தோழர் விழுப்புரம் சிவராஜ் அவர்களே,

அவர்களை அறிமுகப்படுத்திய கழகப் பொதுச் செயலாளர் மானமிகு முனைவர் துரை.சந்திரசேகரன் அவர்களே,

அருமையான 'புதிய சிறகுகள்' என முளைத்துக் கொண்டிருக்கக்கூடிய அருமை இளைய தோழர்களே,

மற்றும் நன்றியுரை கூறவிருக்கக்கூடிய வழக் குரைஞர் கணேசன் அவர்களே,

லேண்ட் மார்க் ஜட்ஜ்மெண்ட்!

இந்த உரையைக் கேட்கும் உலகெங்கும் இருக்கக்கூடிய நண்பர்களே, சமூகநீதி வரலாற் றிலே ஒரு புதிய திருப்பத்தை ஏற்படுத்திய, லேண்ட் மார்க் ஜட்ஜ்மெண்ட் (Landmark Judgement) என்று பெருமைப்படக்கூடிய உச்சநீதிமன்றத்தினுடைய அண்மைத் தீர்ப்பி னுடைய அம்சங்களைப்பற்றி எல்லோருக்கும் தெரிந்திருக்கவேண்டும்.

இது அறிவார்ந்த அவை - காணொலிமூலம் இந்த உரையைக் கேட்கக்கூடியவர்கள் ஒவ்வொருவரும் இதனைப் புரிந்து, நம்முடைய இளைஞர்களுக்குச் சொல்லவேண்டும்.

நம்முடைய இளைஞர்களுக்கேகூட, பல வரலாற்று செய்திகள் புரியாத நிலை. கரடு முரடாக இருந்த பாதையை தந்தை பெரியார் என்ற பேராசான் அவர்கள்,  பக்குவப்படுத்தி, இன்றைக்கு ஒரு கான் கிரீட் சாலையைப் போல - இட ஒதுக்கீட்டை பெற்றுத் தந்தார்கள், திராவிட இயக்கங்கள் -  110 ஆண்டு களுக்குமேலான வரலாற்றைக் கொண்ட திராவிடர் இயக்கம்  - சுயமரியாதை இயக்கம் - திராவிடர் கழகம் - திராவிட முன்னேற்றக் கழகம் - அதேபோல, நீதிக்கட்சித் தலைவர்கள் - சர்.பிட்டி. தியாகராயர், டாக்டர் நாயர்,  நடேசனார் தொடங்கி,  அறிவாசான் தந்தை பெரியார் அவர்களுடைய சுயமரியாதை இயக்கத் தளபதிகள் பலர் உழைத்து, அதற்குப் பிறகு தந்தை பெரியார் அவர்களுடைய இயக்கத்திலே - திராவிடர் கழகத்திலே தன்னை இணைத்துக்கொண்டு தலைமகனாக வாழ்ந்த பேரறிஞர் அண்ணா,  அவர் மறைந்தாலும், அவருடைய பணியை தொடர்ந்து சிறப்பாக செய்து ஒரு வரலாற்றை உருவாக்கி, பொன்னேடுகளாக ஆக்கிய நம்முடைய மானமிகு முத்தமிழ் அறிஞர் சுயமரியாதைக்காரரான கலைஞர் அவர்கள், அதேபோல, மேற்சொன்ன அத்தனைப் பேருடைய பணிகளையும் இன்றைக்கு அகில இந்தியாவே உற்றுப் பார்க்கக்கூடிய அளவிற்கு, உலகமே பாராட்டக் கூடிய அளவிற்கு உருவாக்கிக் கொண்டிருக்கின்ற நம்முடைய 'சமூகநீதிக்கான சரித்திர நாயகர்' இன்றைய தமிழ்நாட்டின் முதலமைச் சர் அவர்கள் ஆகியோர் கட்டிக் காத்த சிறப்புக்குரியதே 'சமூகநீதி' என்பதாகும்.

இது ஒரு நல்ல திருப்பமான நாள்!

அதேபோல, இயக்கத் தோழர்கள், சமூகநீதிக்கு ஒத்துழைப்புத் தரக்கூடிய தமிழ்நாட்டில்  உள்ள  அத்துணை அரசியல் கட்சிகள், அமைப்புகள் எல் லோருக்கும் மகிழ்ச்சி தரக்கூடிய ஒரு வாய்ப்பை உச்சநீதிமன்றத்தின் தீர்ப்பின்மூலம் பெற்றிருக்கிற அருமைத் தோழர்களே, இது ஒரு நல்ல திருப்பமான நாள் என்பதை விளக்கவேண்டும். அதை மற்றவர் களுக்கு எடுத்துச் சொல்லவேண்டும்.

நம்முடைய இளைஞர்களில் பலர் இன்றைக்குக் கான்கிரீட் சாலையில் செல்லுகின்ற காரணத்தினால் தோழர்களே, 'இன்னுமா தேவை இட ஒதுக்கீடு?' என்கிற எதிரிகளுடைய பிரச்சாரத்திற்கு இவர்கள் பலியாகிக் கொண்டிருக்கிறார்கள்!

கோடையில் இளைப்பாற்றிக் கொள்ளும் குளிர்தருவே!

ஏனென்றால்,  இவர்களுக்கு வெயில் தெரியாது; இப்பொழுது இருக்கின்ற நிழலை இவர்கள் அனு பவித்துக் கொண்டிருக்கிறார்கள்!!

எனவே, நிழலில் இருக்கின்ற காரணத்தினால், வெயிலின் கொடுமையையும் தெரிந்து, நிழலுக்கு வந் தால்தான், கோடையில் இளைப்பாற்றிக் கொள்ளும் குளிர்தருவே என்று இந்த இயக்கத்தையும், சமூகநீதி யையும் அவர்கள் வரவேற்றுப் பேசக்கூடிய வாய்ப்பு இருக்கும்.

ஆனால், அவர்களுக்கெல்லாம் இன்றைக்கு சமூக நீதி வாய்ப்புகள் தயார் நிலையிலே உருவாக்கப்பட்டு விட்டது. ஒரு காலத்தில் இதற்கெல்லாம் வாய்ப்பே இல்லை.

திராவிட பார்மூலாவினுடைய சிறப்பு!

ஆனாலும், மிக நீண்ட போராட்டத்திற்குப் பிறகுதான், சட்டப்படி நமக்கு அமையவேண்டிய அந்த உரிமைகளை நாம் பெறுகிறோம். சட்டத் திற்கு அப்பாற்பட்டு (Not out of the way) எந்த உரிமையையும் பெறவில்லை நாம்.

இதில் ஒரு சிறப்பு, திராவிட இயக்கத்தினுடைய நெடிய ஒரு சிறப்பு - 'திராவிட பார்மூலா' என்று சொல்லக்கூடிய  'திராவிட மாடல்' - அதனுடைய அடிப்படையினுடைய சிறப்பு என்னவென்றால்,

மற்ற  மாநிலங்களில், நேற்று முன்தினம்கூட மண்டலுக்கும், கமண்டலுக்கும் ஏற்பட்ட போட்டி என்ற தலைப்பிலே பேசும்பொழுதுகூட நான் சொன்னேன்,

குஜராத்திலே 200 பேருக்கும் மேற்பட்டோர் இட ஒதுக்கீட்டு போராட்டத்திலே - எதிர்த்து பலியாகியிருக்கிறார்கள். இட ஒதுக்கீட்டுக்காக காவல்துறையின் துப்பாக்கிச் சூட்டில், 118 பேர் பீகாரில் பலியாகியிருக்கிறார்கள்.

ஆனால், 1928 ஆம் ஆண்டிலிருந்து சமூகநீதி மண் இந்த மண் - பெரியார் மண் - திராவிட இயக்க மண். ஆகவேதான், அந்தப் பாரம்பரியம் இன்றும் தொடர்ந்து கொண்டிருக்கிறது

மக்கள் மன்றத்திற்கு எதிராக நீதிமன்றங்கள் தீர்ப்பளித்திருக்கின்றன

அதிலே சிறிய இடையூறாக இருந்ததெல்லாம் நீதிமன்றங்கள் - அதனுடைய தீர்ப்புகள். ஒவ்வொரு முறையும் மக்கள் மன்றம் தீர்ப்பளிக்கின்ற நேரத்தில், அதற்கு எதிராக நீதிமன்றங்கள் தீர்ப்பளித்திருக்கின்றன.

1928 ஆம் ஆண்டிலிருந்து இருந்து வந்த கம்யூனல் ஜி.ஓ. - 1950 ஆம் ஆண்டு அரசமைப்புச் சட்டம் வந்த வுடன், கம்யூனல் ஜி.ஓ. செல்லாது என்று முதல் வழக் காகப் போட்டு, அடிப்படை உரிமைப்படி, ஜாதி அடிப் படையில் இட ஒதுக்கீடு வழங்குவது சம வாய்ப்பைத் தடுக்கிறது. உயர்ந்த ஜாதி என்பதற்காக எங்களுக்கு இந்த வாய்ப்பு மறுக்கப்படுகிறது. எனவே, அரச மைப்புச் சட்டத்திற்கு எதிரானது அந்த ஜி.ஓ. - அரசாணை என்று வாதிட்டார்கள்.

வாதிடும்பொழுதுகூட அவர்களுடைய நாணயம் எப்பேர்ப்பட்டது என்பதற்கு அடையாளம் - செண்பகம் துரைராஜன் என்ற பார்ப்பனப் பெண்மணி,  மனுவே போடாமல், பொய்யாக, நீதிமன்றத்திற்குமுன் அபிடவிட் என்கின்ற பொய்ப் பிரமாணப் பத்திரத்தை  கையெழுத்துப் போட்டு தாக்கல் செய்தனர். அதுவே சட்டப்படி நடவடிக்கை எடுக்கப்படவேண்டிய ஒன்று அல்லவா?

அந்த வழக்கில், காலங்காலமாக இருந்த வகுப் புரிமை செல்லாது என்று ஆக்கினர். ஆனால், அது நன்மையாக முடிந்தது.

ஏனென்றால், தீமையை நன்மையாக்கிக் கொள் வதுதான் பகுத்தறிவு.

உடனே, தந்தை பெரியார் அவர்களுடைய போராட்டம் - திராவிட இயக்கத்தினுடைய போராட்டம் மிகப்பெரிய அளவிற்குத் தமிழ்நாட்டில் ஏற்பட்டதினுடைய விளைவு -  அப்போது முதலாவது அரசமைப்புச் சட்டத் திருத்தம் (1951) வந்தது என்பது அந்தக் காலத்தில் மிகப்பெரிய ஒரு திருப்பமாகும்.

ஜாதி அடிப்படையில் யாரையும் பிரிக்கக்கூடாது

அதிலேகூட எந்த அடிப்படையில் கம்யூனல் ஜி.ஓ. செல்லாது என்று தீர்ப்புக் கொடுத்தார்கள் என்றால், சமத்துவ வாய்ப்பு - சம வாய்ப்பை எல்லோருக்கும் கொடுக்கவேண்டும் - ஜாதி அடிப்படையில் யாரையும் பிரிக்கக்கூடாது என்று - அவர்கள் கொடுத்த ஈக்குவா லிட்டி கிளாஸ் - சமத்துவம் என்பதைத் 'தவறாக' அர்த்தப்படுத்தி வியாக்கியானம் செய்தனர்.

அன்றைய உச்சநீதிமன்றத் தீர்ப்பைப் பற்றி சொல் லுகின்ற நேரத்தில், அண்ணல் அம்பேத்கர் அவர்கள், அப்பொழுது அவர் சட்ட அமைச்சராக இருக் கிறார்கள்;

அந்த நிலையில், அவரிடம் கருத்தைக் கேட்ட பொழுது சொன்னார் - இது பல பேருக்கு அடிக்கடி நினைவூட்டப்பட வேண்டிய செய்தியாகும்.

''இந்தத் தீர்ப்பை நான் ஏற்க முடியாது. ஆனால், உச்சநீதிமன்றம்தான் கடைசி நீதிமன்றம் என்பதற்காக அதற்கு நாம் கட்டுப்படவேண்டும். ஆனால், அதை நான் மதிக்கத் தயாராக இல்லை'' (''I am bound by the decision of the S.C., but I am not to respect the same'') என்றார்.

இதைச் சொல்லிவிட்டு,

''அவர்கள் எதை இணைத்துப் பார்த்திருக்கவேண் டுமோ அதை இணைத்துப் பார்க்கத் தவறிவிட்டனர்'' என்றார்.

மிகப்பெரிய  ஆயுதமாக நீதிமன்றத்தை அவர்கள் பயன்படுத்தினார்கள்

எனவே தொடக்க காலத்திலிருந்து மக்கள் மன்றம், சட்டமன்றம், கருத்துகள், தமிழ்நாட்டின் சமூகநீதி எண்ணம் இவற்றோடு நாம் போராடிக் கொண் டிருக்கின்றபொழுது, அவர்களுக்கு ஒரு பாதுகாப்பாக, ஆதிக்கவாதிகளுக்கு, பார்ப்பனர்களுக்கு, மேல் ஜாதிக்காரர்களுக்கு, காலங்காலமாக அனுபவிப்பவர் களுக்கு  மிகப்பெரிய  ஆயுதமாக நீதிமன்றத்தை அவர்கள் பயன்படுத்தினார்கள்.

ஆனால், இப்பொழுது ஒரு பெரிய திருப்பம் ஏற்பட்டு இருக்கிறது. அதுதான் தோழர்களே, ஒரு பெரிய மகிழ்ச்சிக்குரியது.

பாராட்டவேண்டியவர்களை நாம் பாராட்டுகி றோம். நீதிபதிகள் யாருக்கும் நாம் உள்நோக்கம் கற்பிக்கவில்லை. ஆனால், பாதிக்கப்பட்ட மக்கள் தம்முடைய உணர்வுகளைக் குமுறி எடுத்துச் சொல் லக்கூடிய அளவிற்கும், எப்பொழுதும் விழிப்புணர் வோடு இருப்பதுதான், நாம் பெற்றிருப்பவற்றை அகலப்படுத்துவதற்கும், மேலும் பெறவேண்டிய இலக்குகள் நோக்கி நம்முடைய பயணத்தை அமைத் துக் கொள்வதற்கும் வாய்ப்பு ஏற்படும் என்பதற்காகத் தான் இந்தக் கருத்துகளை எடுத்து வைக்கிறோம்.

எப்பொழுதுமே அந்த சூழ்நிலைகள் உண்டு. உதாரணத்திற்குச் சொல்லுகிறேன்.

தெய்வானை Vs சிதம்பரம் வழக்கு

சுயமரியாதைத் திருமணம் செல்லாது - எப்பொழுது - 1953 ஆம் ஆண்டு - தெய்வானை க்ஷிs சிதம்பரம் என்ற வழக்கில்.

காரணம், 'சப்தபதி' (ஓமகுண்டத்தின்முன் ஏழடி) எடுத்து வைக்கவில்லை என்பதால்.

அதற்கு உடனே அண்ணா அவர்கள், திராவிட ஆட்சி தமிழ்நாட்டில் வந்தவுடன், சுயமரியாதைத் திருமணங்கள் செல்லும் என்று ஒரு சட்டத் திருத் தத்தைக் கொண்டு  வந்து, ஒருமனதாக நிறைவேற் றினார்கள் (1968).

திராவிட இயக்க ஆட்சி, திராவிட மாடல் ஆட்சி 50 ஆண்டுகாலம் நடைபெற்றதினுடைய காரணத் தினால், நடைமுறையில் சட்டப்படி சுயமரியாதைத் திருமணங்கள் செல்லும் என்று வந்தது.

இது ஏதோ உரிமை மட்டுமல்ல - நம்முடைய தாய்மார்களுக்கு, சூத்திரர்களுக்கு, கீழ்ஜாதிக்காரர் களுக்கு, ஒடுக்கப்பட்டவர்களுக்கு - திருமண உரிமையே கிடையாது என்பதுதானே மனுதர்மம். அதற்குவேண்டிய அடையாளங்கள்தானே- 'சப்தபதி' என்கின்ற சடங்குகள் எல்லாம்.

எனவே, அதை வைத்துக்கொண்டு சுயமரியாதைத் திருமணங்கள் செல்லாது என்று  நீதிமன்றம் சொன்ன நேரத்தில்,  அதற்குப் பிறகு திராவிட இயக்க ஆட்சி அமைந்து, புதுப்பித்து சட்டம் வந்தது.

அப்படி சட்டம் வந்து 50 ஆண்டுகளுக்கு பிறகும் கூட, சில ஆண்டுகளுக்கு முன்பு -  சுயமரியாதைத் திருமணங்கள் செல்லாது என்று வழக்குத் தொடுத்தனர் - சென்னை உயர்நீதிமன்றத்தில்.

அண்ணா கொண்டு வந்த அந்த சட்டம் செல்லாது என்று தீர்ப்பளியுங்கள் என்று அந்த வழக்குத் தொடுக்கப்பட்டது.

ஆனால், சுயமரியாதைத் திருமணம் செல்லும் என்று அதே சென்னை உயர்நீதிமன்றம் தீர்ப்புக் கொடுத்தது. இதுபோன்று நிறைய சொல்லிக்கொண்டே போகலாம்.

நான் அடிக்கடி சொல்லுகின்ற ஆங்கிலப் பழ மொழி,

''The Public opinion marches forward;  Law comes limping behind.''

அதேமாதிரி மண்டல் -பரிந்துரைபற்றிய தீர்ப் பும்கூட.

நம்முடைய சமூகநீதிக் காவலர் வி.பி.சிங் அவர் கள், அரசாணை போட்ட உடன், ரங்கநாத் மிஸ்ரா என்பவர் 'மண்டலுக்குத்' தடை போட்டார்.

பி.எஸ்.கிருஷ்ணன்

அதைப்பற்றியெல்லாம் அன்றைக்கு ஒன்றிய சமூகநலத் துறை செயலாளராக இருந்த பி.எஸ்.கிருஷ்ணன் அய்.ஏ.எஸ்.,  அவர்கள், ஓர் ஆழமான புத்தகத்தை எழுதியிருக்கிறார் - அதில் மிகத் தெளிவான விளக்கங்களை சொல்லியிருக்கிறார்.

உறுதியாக நின்றார் நம்முடைய சமூகநீதிக் காவலர் பிரதமர் வி.பி.சிங் அவர்கள்!

மண்டலை எதிர்த்து வழக்குத் தொடுத்த நேரத்தில், ஜீவன் ரெட்டி, பரிபூரண அய்யங்கார்  ஆகிய இரண்டு நீதிபதிகள் மண்டலுக்குத் தடை போட்டு, உத்தரவு போட்ட நேரத்தில்,

திராவிடர் கழகம் அந்தத் தீர்ப்பின் நகலைக் கொளுத்தி, உச்சநீதிமன்றத்திற்கு நம்முடைய கண்ட னத்தைத் தெரிவித்தது.

காரணம்,  நம்முடைய நோக்கம் அவமதிக்கவேண் டும் என்பதல்ல. ஆனால், நாங்கள் புண்பட்டிருக்கின் றோம் என்பதைப் பதிய வைக்கவேண்டும் என்பதற் காகத்தான்.

நீதிபதி ஜீவன் ரெட்டி தலைமையில்...

அதற்குப் பிறகு, அதே நீதிபதி ஜீவன் ரெட்டி அவர்களுடைய தலைமையில்தான், இந்திரா சகானி - மண்டல் கமிசன் வழக்கில், மண்டல் கமிசன் கொடுத்த 27 சதவிகித இட ஒதுக்கீடு பிற்படுத்தப்பட்ட வர்களுக்குச் செல்லும் என்று 9 நீதிபதிகள் கொண்ட அமர்வுமூலம்  தீர்ப்பளித்தார்.

பெரும்பகுதி தெளிவான ஒரு தீர்ப்பு - வரலாற்று முக்கியத்துவம் வாய்ந்த தீர்ப்பாகும் அது.

கொஞ்சம் மாறுபட்ட கருத்துகள் எல்லாம் அந்தத் தீர்ப்பில் இருக்கிறது - அந்த மெஜாரிட்டி தீர்ப்பில்.

வரலாற்று சிறப்புமிக்க - சமூகநீதிப் பிரகடனம்

நாம் இணைந்து கொடுக்கமாட்டோம் என்ற நிலையில்தான், நீதிபதி இரத்தினவேல் பாண் டியன் அவர்கள், மிகப்பெரிய ஒரு தனி தீர்ப்பை  அந்த அமர்வில், வரலாற்று சிறப்புமிக்க - சமூகநீதிப் பிரகடனம் போன்று கொடுத்திருக் கிறார்.

இது ஓர் இரண்டாவது உதாரணமாகும்.

மிக நேர்மையாக நடக்கவேண்டும் என்கின்ற நீதிபதிகளும் இருக்கிறார்கள். அப்படி வந்த ஓர் அற்புதமான தீர்ப்புதான் நண்பர்களே, இப்பொழுது வந்திருக்கின்ற உச்சநீதிமன்றத் தீர்ப்பாகும்.

உச்சநீதிமன்றத்தினுடைய மாண்பமை நீதிபதி களாக இருக்கக்கூடிய டாக்டர் டி.ஒய்.சந்திரசூட் அவர்களும், போபண்ணா அவர்களும் கொடுத்திருக் கின்ற தீர்ப்பு, மிக அற்புதமான தீர்ப்பு மட்டுமல்ல - வரலாற்றுச் சிறப்புமிக்கத் தீர்ப்பாகும்.

நம்முடைய கழக வெளியுறவுத் துறை செயலாளர் கருணாநிதி அவர்கள், அந்த வரலாற்றை சொல்லி விட்டார். அதை நான் அப்படியே வழிமொழிகிறேன்.

அவர் என்னென்ன வாதங்கள், வரலாற்று உண் மைகளைச் சொன்னார்களோ, அதை வைத்துக் கொண்டு, அதற்குமேலே கட்டடத்தை எழுப்புவது போன்று, வாதங்களை எழுப்பி,  எப்படி 27 சதவிகித இட ஒதுக்கீடு கிடைத்தது என்பது மட்டும் முக்கியமல்ல; அதைவிட, ''லேண்ட் மார்க் ஜட்ஜ்மெண்ட்'' என்று குறிப்பிடத்தகுந்த வரலாறு படைத்த ஒரு தீர்ப்பாக தற்போதைய தீர்ப்பு இருக்கிறது என்று சொல்வதற்குக் காரணங்கள் உண்டு. அதை நன்றாக நீங்கள் புரிந்துகொள்ளவேண்டும்.

27 சதவிகித இட ஒதுக்கீட்டில், தி.மு.க. வெற்றி பெற்றது - இந்தியா முழுவதும் அதனுடைய பலன் கிடைத்தது

நீங்கள் புரிந்துகொண்டால் மட்டும் போதாது நண்பர்களே - ஒவ்வொரு வழக்குரைஞர்களுக்கும்கூட இதைத் தெளிவுபடுத்தவேண்டும். ஏனென்றால்,  பல பேர் இந்தத் தீர்ப்பை சாதாரணமாக நினைத்துக் கொண்டிருக்கிறார்கள். 27 சதவிகித இட ஒதுக்கீட்டில், தி.மு.க. வெற்றி பெற்றது - இந்தியா முழுவதும் அதனுடைய பலன் கிடைத்தது என்று சாதாரணமாக நினைக்கிறார்கள்.

''வெற்றிக்குப் பல கதாநாயகர்கள் உண்டு. யார் காரணம் என்றால், நாங்கள்தான் காரணம் என்று பி.ஜே.பி.,க்காரர்களும்கூட இப்பொழுது வருகிறார் கள். இதுதான் விசித்திரம்!

(தொடரும்)

'கல்வியில் இட ஒதுக்கீடு செல்லும்' உச்சநீதிமன்றம் தீர்ப்பு - கழக வெளியுறவுத் துறை செயலாளர் கோ.கருணாநிதி விளக்கவுரை

ஓபிசி பிரிவினருக்கு ஒதுக்கப்பட்ட சதவிகிதம் பூஜ்ஜியம் என்கிற விவரத்தை மருத்துவக் கல்வி நிலையங்களில் படிக்கக்கூடிய மாணவர்கள், வெளி உலகிற்குக் கொண்டு வந்தார்கள்

 February 14, 2022 • Viduthalai

தமிழர் தலைவர் ஆசிரியர் புள்ளிவிவரங்களோடு கூடிய  அறிக்கையின்மூலம் தெளிவுபடுத்தினார்

கழக வெளியுறவுத் துறை செயலாளர் கோ.கருணாநிதி விளக்கவுரை

சென்னை, பிப்.14   அகில இந்திய தொகுப்பு இடங்களில், மருத்துவக் கல்வி இடங்களை நிரப்பும் பொழுது, அந்தந்த மாநில இட ஒதுக்கீடு அடிப்படையில் நிரப்பவேண்டும் என்கின்ற அந்த விதியினை, ஒன்றிய அரசே நிராகரித்தது. அதன்படி நிறைவேற்றவில்லை;  எஸ்.சி., எஸ்.டி., பிரிவினருக்கு  15 - 7.5 என்கின்ற       இட ஒதுக்கீட்டை நிறைவேற்றினார்களே தவிர, ஓபிசி பிரிவினருக்கான இடங்களை நிறைவேற்றவில்லை. ஓபிசி-க்கான பிரிவினருக்கு ஒதுக்கப் பட்ட சதவிகிதம் பூஜ்ஜியம் என்கின்ற அள விலேதான் இருந்தது.  அந்த விவரங்களை, மருத்துவ கல்வி நிலையங் களில் படிக்கக்கூடிய  மாணவர்கள், அதனுடைய அமைப்புகள் வெளி உலகிற்குக் கொண்டு வந்தார்கள் என்றார்   திராவிடர் கழக வெளியுறவு துறை செயலாளர்

கோ.கருணாநிதி  அவர்கள்.

உச்சநீதிமன்றத்தின் வரலாறு படைத்த தீர்ப்பு

கடந்த 1.2.2022 அன்று மாலை  உச்சநீதிமன்றத்தின் வரலாறு படைத்த தீர்ப்பு என்ற தலைப்பில் காணொலி கூட்டம் நடைபெற்றது. அக்கூட்டத்தில் திராவிடர் கழக வெளியுறவுத் துறை செயலாளர் கோ.கருணாநிதி  தொடக்கவுரையாற்றினார்.

அவரது தொடக்கவுரை வருமாறு:

‘‘உச்சநீதிமன்றத்தின் வரலாறு படைத்த தீர்ப்பு'' என் கின்ற தலைப்பிலே நடைபெறுகின்ற இந்தக் காணொலி சிறப்புக் கூட்டத்தில் நிறைவுரை - சிறப்புரை நிகழ்த்த விருக்கும் நம்முடைய மதிப்பிற்கும், வணக்கத்திற்கும் உரிய தமிழர் தலைவர் அவர்களே,

வரவேற்புரை நிகழ்த்திய மூத்த வழக்குரைஞர் த.வீரசேகரன் அவர்களே,

இணைப்புரை ஆற்றுகின்ற தம்பி பிரின்சு, மற்றும் திராவிடர் கழக நிர்வாகிகளே, தோழர்களே, புதிய சிறகுகளினுடைய அருமைத் தம்பிகளே, தங்கைகளே அனைவருக்கும் வணக்கம்.

மருத்துவப் படிப்பில், அகில இந்திய தொகுப்பு இடங்களில்,  பிற்படுத்தப்பட்டோருக்கு 27 சதவிகித இட ஒதுக்கீட்டை உறுதி செய்து உச்சநீதிமன்றம் அளித்த தீர்ப்பின் சிறப்பு அம்சங்களை மதிப்பிற்குரிய ஆசிரியர் அவர்கள் இங்கே விரிவாக எடுத்துரைக்க உள்ளார்.

இந்தத் தீர்ப்பினை வரலாறு படைத்த தீர்ப்பாக நாம் ஏன் குறிப்பிடுகின்றோம் என்பது குறித்து ஒரு சில செய்திகளை உங்களுடைய கவனத்திற்குக் கொண்டுவர விரும்புகின்றேன்.

ஆல் இண்டியா கோட்டா

வெளி மாநிலமாணவர்களுக்கும் வாய்ப்பு அளிக்கக் கூடிய வகையிலே, 1984 ஆம் ஆண்டு உச்சநீதிமன்றம், அகில இந்திய தொகுப்பு (ஆல் இண்டியா கோட்டா) என்ற முறையை மருத்துவம் மற்றும் பல் மருத்துவக் கல்வியில் உருவாக்கியது.

அன்றைய தினம், பிரதீப் ஜெயின் தொடர்ந்த வழக்கின் அடிப்படையிலே, ஜூன் 22 ஆம்  தேதி, 1984 ஆம் ஆண்டு அந்தத் தீர்ப்பின் அடிப்படையில்தான், இந்த அகில இந்திய தொகுப்பு என்ற திட்டம் உருவாக்கப்பட்டது.

இந்தத் தீர்ப்பின் அடிப்படையிலும், அதன் பிறகு வந்த பல்வேறு தீர்ப்புகளின் அடிப்படையிலும், தற் போது மருத்துவக் கல்வி பட்டப் படிப்புகளிலே - அதாவது எம்.பி.பி.எஸ்., பி.டி.எஸ். படிப்புகளில் 15 சதவிகித இடங்களையும், முதுநிலை பட்டப் படிப்புகளில் - அதாவது எம்.டி., எம்.எஸ்., எம்.டி.எஸ். ஆகிய படிப்புகளில் 50 சதவிகித இடங்களையும் மாநிலங்கள் தங்களுடைய மருத்துவக் கல்லூரிகளிலிருந்து அகில இந்திய தொகுப்பிற்கு ஒவ்வொரு ஆண்டும் அளித்திட வேண்டும் என்கின்ற ஒரு திட்டத்தினை, உச்சநீதிமன்றத் தீர்ப்பின் அடிப்படையிலே ஒன்றிய அரசு உருவாக்கியது.

உச்சநீதிமன்றம் தீர்ப்பு கூறியதன் அடிப்படையில், இட ஒதுக்கீடு வழங்கப்படவில்லை

இவ்வாறு ஒதுக்கப்பட்ட இடங்களிலே, எஸ்.டி., எஸ்.சி., பிரிவினருக்கு தொடக்கக் காலகட்டத்தில் இட ஒதுக்கீடு இல்லை. முழுவதும் தகுதி என்கின்ற அந்தப் போர்வையில், இடங்கள் நிரப்பப்படவேண்டும் என்ப தாக உச்சநீதிமன்றம் தீர்ப்பு கூறியதன் அடிப்படையில், இட ஒதுக்கீடு வழங்கப்படவில்லை.

மன்மோகன்சிங் தலைமையிலான

யு.பி.ஏ.  அரசு

2007 ஆம் ஆண்டு, அபய்நாத் எதிர் டில்லி பல்கலைக் கழகம் என்கின்ற வழக்கு, உச்சநீதிமன்றத்திற்கு அந்த வழக்கு வந்த நிலையில், அன்றைய தினம் மன்மோகன் சிங் தலைமையிலான யு.பி.ஏ.  அரசு, உச்சநீதிமன்றத்தில் வழக்காடிய, அரசு வழக்குரைஞர் அகில இந்திய தொகுப்பிலும் மருத்துவ மேற்படிப்பில், அதேபோல, பட்டப் படிப்பில், எஸ்.சி., எஸ்.டி., பிரிவினருக்கு இட ஒதுக்கீடு அளிக்கவேண்டும் என்கின்ற ஒரு முடிவினை, உச்சநீதிமன்றத்திற்குத் தெரிவித்து, அதனை உச்சநீதி மன்றம் ஏற்றுக்கொண்டதின் அடிப்படையில்தான்,

2007-2008 கல்வி ஆண்டில், முதுநிலை படிப்பில், எஸ்.சி., எஸ்.டி., பிரிவினருக்கு இட ஒதுக்கீடும்,

அதேபோல, பட்டப் படிப்பில், 2008-2009 கல்வி ஆண்டில் இட ஒதுக்கீடும் அவர்களுக்கு அளிக்கப் பட்டது.

ஆனால், அந்தக் காலகட்டத்தில், ஓ.பி.சி. பிரிவின ருக்கான ஒரு சட்டம் இயற்றப்பட்டாலும், உச்சநீதிமன் றத்தில் அதற்கான தடையாணை இருந்த நிலையில், ஓ.பி.சி., பிரிவினருக்கு அந்த நிலையில், எந்தவிதமான கோரிக்கையும் எழுப்பப்படவில்லை.

27 சதவிகித இட ஒதுக்கீட்டை

உடனடியாக அவர்கள் நிறைவேற்றவில்லை

அந்த நிலையில்தான், மத்திய அரசினுடைய கல்வி நிலையங்களில், அதற்குப் பின்னால் சேர்ந்த, ஓ.பி.சி. பிரிவினருக்கு 27 சதவிகித இடங்கள் மத்திய அரசி னுடைய கல்வி நிலையங்களில் அளிக்கப்பட்டாலும்,

அய்.அய்.டி., அய்.அய்.எம்., அதேபோல, எய்ம்ஸ் போன்ற கல்வி நிறுவனங்களிலே, 27 சதவிகித இட ஒதுக்கீட்டை உடனடியாக அவர்கள் நிறைவேற்ற வில்லை. மாறாக, ஒவ்வொரு ஆண்டும் நாங்கள் 9 சதவிகித இடங்களைத்தான் அளிக்க முடியும் என்று சொல்லி, ஏறத்தாழ 4, 5 ஆண்டுகளை அதிலேயே இழுத்தடித்துவிட்டார்கள்.

அப்போதுகூட மருத்துவப் படிப்பில் அகில இந்திய தொகுப்பில், ஓ.பி.சி. பிரிவினருக்கு இட ஒதுக்கீடு குறித்து எந்த சட்டமும் ஒன்றிய அரசால் நிறைவேற்றப் படவில்லை.

இந்த சூழலில்தான், 2010 மற்றும் 2012 ஆம் ஆண்டு மெடிக்கல் கவுன்சில் ஆஃப் இந்தியா என்று சொல்லப்படுகின்ற இந்திய  மருத்துவக் கழகம் - அதில், அப்பொழுது இருக்கக்கூடிய விதிகளில் சில திருத் தங்களைச் செய்தது.

மருத்துவம் மற்றும் பல் மருத்துவப் படிப்பிலே சில திருத்தங்களைச் செய்து, நீட் என்கின்ற பொது நுழைவுத் தேர்வின்மூலம் மாணவர் சேர்க்கை நடைபெறும் என்கின்ற அறிவிப்பினை வெளியிட்டது.

விதியில் சொல்லப்பட்ட திருத்தம்

அந்தத் திருத்தத்தின் அடிப்படையில்தான், அதில் சொல்லப்பட்ட வாசகங்கள் - இன்றைக்குத் திராவிடர் கழகம், திராவிட முன்னேற்றக் கழகம் உள்ளிட்ட தோழ மைக் கட்சிகள் வழக்காடிய நிலையில், அந்த விதியைச் சுட்டிக்காட்டித்தான் வழக்கே தொடுக்கப்பட்டது.

அந்த விதியில் சொல்லப்பட்ட திருத்தம் என்ன வென்று சொன்னால்,

''The  Reservation of seats  in Medical Colleges / Institutions for respective categories shall be as per applicable laws prevailing in States / Union Territories.''

என்பதாக, மருத்துவப் படிப்பு - முதுநிலை படிப்பிற் கான சேர்க்கையிலும் 2012 ஆம் ஆண்டிலே பட்டப் படிப்பிற்கான விதிகளிலும்  திருத்தம் செய்தார்கள்.

அந்த விதிகளின்படி அகில இந்திய தொகுப்பு இடங்களில், மருத்துவக் கல்வி இடங்களை நிரப்பும் பொழுது, அந்தந்த மாநில இட ஒதுக்கீடு அடிப்படையில் நிரப்பவேண்டும் என்கின்ற அந்த விதியினை, ஒன்றிய அரசே நிராகரித்தது. அதன்படி நிறைவேற்றவில்லை.

மத்திய பொது சுகாதாரத் துறை இயக்குநரகம் என்று சொல்லப்படுகின்ற  (DGHS) - அதுதான் மருத்துவப் படிப்பிற்கான கலந்தாய்வினை நடத்துகின்றது.

ஓபிசி-க்கான பிரிவினருக்கு

ஒதுக்கப்பட்ட சதவிகிதம் பூஜ்ஜியம்

அவர்கள் எஸ்.சி., எஸ்.டி., பிரிவினருக்கு  15 - 7.5 என்கின்ற       இட ஒதுக்கீட்டை    நிறைவேற்றினார் களே தவிர, ஓபிசி-க்கான இடங்களை நிறைவேற்ற வில்லை. ஓபிசி-க்கான பிரிவினருக்கு ஒதுக்கப் பட்ட சதவிகிதம் பூஜ்ஜியம் என்கின்ற அள விலேதான் இருந்தது.

மருத்துவ கல்வி நிலையங்களில் படிக்கக்கூடிய  மாணவர்கள்,

வெளி உலகிற்குக் கொண்டு வந்தார்கள்

அகில இந்திய தொகுப்பு இடங்களுக்கு நீட் தேர்வின் அடிப்படையில் மாணவர் சேர்க்கை 2017 ஆம் ஆண் டிற்குப் பிறகு முழுமையாக நடைபெறத் தொடங்கிய பிறகுதான், அகில இந்திய தொகுப்பு இடங்களில் ஓபிசி பிரிவினருக்கு இட ஒதுக்கீடு மறுக்கப்படுகின்றது என் கின்ற  அந்த விவரங்களை, மருத்துவ கல்வி நிலையங் களில் படிக்கக்கூடிய  மாணவர்கள், அதனுடைய அமைப்புகள் வெளி உலகிற்குக் கொண்டு வந்தார்கள்.

மக்களவையில் கேள்வி எழுப்பினார்

இந்தப் பிரச்சினை குறித்து அகில இந்திய பிற்படுத்தப்பட்டோர் கூட்டமைப்பின் சார்பில், ஒரு கடிதம் நாடாளுமன்ற பிற்படுத்தப்பட்டோர் குழுவின் தலைவராக இருந்த திரு.தினேஷ்சிங் அவர்களுக்கு அனுப்பி வைக்கப்பட்டது. பாரதிய ஜனதா கட்சியின் சார்பில் நாடாளுமன்ற உறுப்பினர் அவர்.

அவருடைய கவனத்திற்கு எடுத்துச் சென்று, மார்ச் 23 ஆம் தேதி, 2018 இல் நாடாளுமன்ற மக்களவையில் இதுகுறித்து அவர் ஒரு கேள்வி எழுப்பினார்.

அகில இந்திய தொகுப்பில் பிற்படுத்தப்பட்டோருக்கு  இட ஒதுக்கீடு அளிக்கப்படவில்லை என்பது குறித்து அவர் கேள்வி எழுப்பிய நிலையில்,

அதற்குப் பதிலளித்த அன்றைய சுகாதாரத் துறை இணையமைச்சர் அஸ்வின்குமார் துபே அவர்கள்,

27 சதவிகித இட ஒதுக்கீட்டை நாங்கள் ஒன்றிய அரசு கல்வி நிலையங்களில் நிறைவேற்றுகின்றோம் என்ப தோடு நிறுத்திக் கொண்டார்.

அகில இந்திய தொகுப்பு இடங்களைப்பற்றி தன்னுடைய பதிலில் எதையும் குறிப்பிடவில்லை.

மாநிலங்களவை உறுப்பினர்

வழக்குரைஞர் திரு.வில்சன்

அதனைத் தொடர்ந்து திராவிட முன்னேற்றக் கழக  மாநிலங்களவை உறுப்பினர் வழக்குரைஞர் மரியா தைக்குரிய திரு.வில்சன் அவர்கள், ஜூன் 1, 2019 ஆம் தேதியன்று இதுகுறித்த பிரச்சினையை மாநிலங் களவையில் எழுப்பினார்.

மாநில இட ஒதுக்கீடு அடிப்படையில், அகில இந்திய தொகுப்பு இடங்களுக்கு, பிற்படுத்தப்பட்டவர்களுக்கு இட ஒதுக்கீடு அளிக்கப்படவேண்டும் என்பதனை அந்த ரெகுலேஷன் விதியை சுட்டிக்காட்டி அந்தப் பிரச்சினையை அவர் எழுப்பினார்

ஆனால், அதற்குரிய பதில் அளிக்கப்படவில்லை.

ஒன்றிய  சுகாதாரத் துறை

அமைச்சருக்குக் கடிதம்

தொடர்ந்து, நவம்பர் 1, 2019 இல் வில்சன் அவர்கள், அன்றைய ஒன்றிய சுகாதாரத் துறை அமைச்சராக இருந்த  ஹர்ஷ்வர்தன் அவர்களுக்கு விரிவான ஒரு கடிதத்தை எழுதினார்.

அதற்குப் பதிலளித்த சுகாதாரத் துறை அமைச்சர் ஹர்ஷ்வர்தன் அவர்கள், டிசம்பர் 18, 2019 அன்று அளித்த பதிலில், இந்தப் பிரச்சினை தொடர்பாக உச்சநீதிமன்றத்தில் சலோனி  குமாரி என்பவர் 2015 இல் ஒரு வழக்குத் தொடர்ந்திருக்கின்றார் என்கின்ற  ஒரு தகவலை, அந்த பதிலில்தான், முதன்முதலாகக் குறிப் பிடுகின்றார்.

ஊடகங்களில் எந்தச் செய்தியும் வரவில்லை; ஒன்றிய

அரசின் சார்பிலும் சொல்லவில்லை

2015 இல், சலோனி குமாரி என்பவர் உச்சநீதி மன்றத்தில் பிற்படுத்தப்பட்ட மக்களுக்கு 27 சத விகித இட ஒதுக்கீட்டை - அகில இந்திய தொகுப் பில் கொடுத்திருந்தால், தனக்கு மருத்துவ முது நிலை படிப்பிற்குச் செல்லக்கூடிய வாய்ப்பு கிடைத்திருக்கும் என்பதுதான் வழக்கு.

ஆனால், அதுகுறித்து ஊடகங்களில் எந்தச் செய்தியும் வரவில்லை. ஒன்றிய அரசின் சார்பி லேயும் சொல்லவில்லை.

முதன்முறையாக, டிசம்பர் 18, 2019 ஆம் தேதிதான் அந்தத் தகவலை ஒன்றிய அமைச்சர் வெளியிட்டார்.

அதற்குப் பின்னர், 2020 ஆம் கல்வியாண்டில், மருத்துவ கல்வி பட்ட மேற்படிப்பு (பிஜி 2020)க் கான தேர்ச்சி பெற்றவர்களின் பட்டியலை, 2020, ஏப்ரல் மாதத்தில் ஒன்றிய அரசு, அதனுடைய சுகாதாரத் துறை அமைச்சகம் வெளியிட்டது.

புள்ளிவிவரங்களோடு கூடிய 

தமிழர் தலைவர் ஆசிரியரின் அறிக்கை

அதில், ஓபிசி பிரிவினருக்கு இட ஒதுக்கீடு மறுக்கப்பட்ட அந்த அநீதியை சுட்டிக்காட்டி, திராவிடர் கழகத் தலைவர் நம்முடைய மதிப் பிற்குரிய தமிழர் தலைவர் அவர்கள், 8.5.2020 அன்று ஓர் அறிக்கையினை வெளியிட்டார்.

முதன்முதலாக தமிழ்நாடு அரசியலில், இது குறித்து வந்த விரிவான அறிக்கையாகும் அது.

அதற்குப் பின்பு மீண்டும் மே 16, 2020 இல் ஆசிரியர் அவர்கள் புள்ளிவிவரங்களோடு அறிக்கை எழுதி யிருந்தார்.

இந்த சமூக அநீதியை எதிர்த்து, அனைவரும் ஒன்று திரண்டு போராடி, வெற்றி பெறவேண்டும் என்பதுதான் அந்த அறிக்கையினுடைய சாராம்சம்.

ஒன்றிய அரசுக்குக்

கண்டனம் தெரிவித்து அறிக்கை

அதனைத் தொடர்ந்து திராவிட முன்னேற்றக் கழகத் தலைவர் - அன்றைய தினம் எதிர்க்கட்சித் தலைவராக இருந்த மரியாதைக்குரிய திரு.மு.க.ஸ்டாலின் அவர்கள், இதுகுறித்து ஒன்றிய அரசுக்குக் கண்டனம் தெரிவித்து அறிக்கை வெளியிட்டார்.

தோழமை கட்சிகளின் கூட்டத்தை மே 31, 2020 அன்று நடத்தி, அக்கூட்டத்தில், இப்பிரச்சினை குறித்து வழக்குத் தொடர்வது என்று முடிவு செய்யப்பட்டது.

திராவிடர் கழகத்தின் சார்பிலே, ஜூன் 4, 2020 ஆம் தேதியன்று சென்னை உயர்நீதிமன்றத்தில், மருத்துவப் படிப்பில், அகில இந்திய தொகுப்பு இடங்களில்,  அந்தந்த மாநில இட ஒதுக்கீட்டின் அடிப்படையில், குறிப்பாக, தமிழ்நாட்டைப் பொறுத்தவரையில், பிற்படுத்தப்பட் டோருக்கு 50 சதவிகித இட ஒதுக்கீடு என்கின்ற அடிப்படையில், அந்த ஒதுக்கீட்டு இடங்களை ஒன்றிய அரசு தரவேண்டும் என்பதாக, அந்த மனுவிலே குறிப்பிடப்பட்டு, வழக்கு தாக்கல் செய்யப்பட்டது.

உச்சநீதிமன்றத்தில் வழக்கு

திராவிட முன்னேற்றக் கழகம் மற்றும் அதனுடைய தோழமைக் கட்சிகள் இப்பிரச்சினை குறித்து உச்சநீதிமன்றத்தில் வழக்குத் தொடர்ந்தன.

சென்னை உயர்நீதிமன்றத்தில் வழக்கு

உச்சநீதிமன்றத்தின் அறிவுறுத்தலின்படி, அவர்கள் சென்னை உயர்நீதிமன்றத்தில் 11.6.2020 ஆம் தேதி அன்று வழக்குத் தொடர்ந்தார்கள்.

அவர்களும், எம்.சி. ஆக்ட் பிரிவினைச் சுட்டிக்காட்டி, அதன் அடிப்படையில், மாநில அரசு  என்ன இட ஒதுக்கீடு தருகின்றதோ, அதன்படியே அகில இந்திய தொகுப்பிலும் இட ஒதுக்கீடு தரவேண்டும் என்று அந்த மனுவில் குறிப்பிட்டு வழக்குத் தொடர்ந்திருந்தனர்.

இந்த நிலையில், அகில இந்திய பிற்படுத்தப்பட்டோர் கூட்டமைப்பின் சார்பில், ஒன்றிய அரசு வெளியிட்ட பட்டியலை ஆராய்ந்து, மாநில வாரியாக எத்தனை இடங்கள் தரப்பட்டு இருக்கிறது ஓபிசி பிரிவினருக்கு  என்று பார்த்தபொழுது, பூஜ்ஜிய சதவிகிதம் என்ற விவரம் வெளியிடப்பட்டது.

தேசிய பிற்படுத்தப்பட்டோர்

ஆணையத்தில் புகார்

தேசிய பிற்படுத்தப்பட்டோர் ஆணையத்திற்குப் புகார் கொடுக்கப்பட்டது. அதனடிப்படையில், ஒன்றிய சுகாதாரத் துறை செயலாளர், தேசிய பிற்படுத்தப்பட்டோர் ஆணைய அலுவலகத்திற்கு நேரில் வரவழைக்கப்பட்டு, விவரம் கேட்கப்பட்டது.

அப்பொழுது அவர் என்ன சொன்னார் என்றால், உச்சநீதிமன்றத்தில் சலோனி குமாரி வழக்குத் தீர்ப்பின் அடிப்படையில் நாங்கள் இதுகுறித்து முடிவு செய்வோம் என்று சொன்னார்.

அவர் சொன்ன காலகட்டம் மே, 2020 ஆம் ஆண்டு. சலோனி குமாரி வழக்கு வந்தது 2015 ஆம் ஆண்டு. ஆனால், அய்ந்தாண்டுகள்  சென்ற பிறகும்கூட, ஒன்றிய சுகாதாரத் துறை இந்த வழக்கு குறித்து எந்தவிதமான நடவடிக்கையும் எடுக்காமல் இருந்திருக்கிறது.

நம்முடைய தமிழர் தலைவர் அவர்களுக்கு மிக முக்கிய பங்கு!

ஆனால், தமிழ்நாட்டினுடைய வரலாற்றி லேயே, இந்தப் பிரச்சினை குறித்து, ஆளும் கட்சி, எதிர்க்கட்சி  என்று இருந்த அனைத்துக் கட்சி களையும் ஒருங்கிணைக்கப்பட்டது - அதிலே நம்முடைய தமிழர் தலைவர் அவர்களுக்கு மிக முக்கிய பங்கு உண்டு.

தமிழ்நாட்டில் உள்ள அனைத்துக் கட்சிகளும் ஒன்றிணைந்து (பா.ஜ.க.வை தவிர) ஒரே நிலையில் நின்று, நீதிமன்றத்தில் வழக்குத் தொடுத்தன. ஒன்றிய அரசினுடைய எம்.சி. ஆக்ட் என்று சொல்லப்பட்ட அந்த விதிகளின்படி, மாநிலத்தில் என்ன இட ஒதுக்கீடு தரப்படுகிறதோ, அதையே அகில இந்திய தொகுப்பிலும் தரவேண்டும் என்று வழக்குத் தொடரப்பட்டது.

ஒன்றிய அரசின் சார்பில், சென்னை உயர்நீதி மன்றத்தில், அபிடவிட்டில் என்ன தெரிவிக் கப்பட்டு இருந்தது என்று சொன்னால்,

''நாங்கள் மாநில வாரியான இட ஒதுக்கீட்டை, 50 சதவிகிதத்திற்கு மிகாமல் தரவிருக்கின்றோம்'' என்று சொல்லப்பட்டது.

ஒன்றிய அரசு அபிடவிட் தாக்கல்

இதேபோன்ற ஒரு அபிடவிட்டைத்தான் உச்சநீதி மன்றத்தில், சலோனி குமாரி வழக்கிலும் தாக்கல் செய்யப்பட்டது.

மாநிலத்தில் என்ன இட ஒதுக்கீடு இருக்கிறதோ, அதனடிப்படையிலேயே நாங்கள் தரலாம் என்கின்ற ஒரு திட்டத்தை வைத்திருக்கின்றோம். இதுகுறித்து மாநி லங்களோடு கலந்தாய்ந்து நாங்கள் முடிவு செய்வோம் என்று 2016 ஆம் ஆண்டு பிப்ரவரி மாதத்தில், உச்ச நீதிமன்றத்தில் ஒன்றிய அரசு அபிடவிட் தாக்கல் செய்தது.

அதேபோன்றுதான், சென்னை உயர்நீதிமன்றத்திலே ஜூன்  2020 ஆம் ஆண்டு தாக்கல் செய்தார்கள்.

(தொடரும்)

உச்சநீதிமன்றத் தீர்ப்பை பகுத்தறிவுப் பகலவன் தந்தை பெரியாருக்கு காணிக்கையாக்குகிறேன் என்றார் முதலமைச்சர் மு.க.ஸ்டாலின் அவர்கள்

February 15, 2022 • Viduthalai

தமிழ்நாட்டில் உள்ள அனைத்துக் கட்சிகளும் ஒரே உணர்வில் இருந்ததினால் கிடைத்த வெற்றி இந்தத் தீர்ப்பு

தமிழர் தலைவர் ஆசிரியர் விளக்கமாக விவரமாக நமக்கு சொல்லவிருக்கின்றார்

கழக வெளியுறவுத் துறை செயலாளர் கோ.கருணாநிதி உரை

சென்னை, பிப்.15   தமிழ்நாட்டில் உள்ள அனைத்துக் கட்சிகளும் ஒரே உணர்வில் இருந்ததினால் கிடைத்த வெற்றி இந்தத் தீர்ப்பு. உச்சநீதிமன்றத் தீர்ப்பை பகுத் தறிவுப் பகலவன் தந்தை பெரியாருக்குக் காணிக்கை யாக்குகிறேன் என்றார் முதலமைச்சர் மு.க.ஸ்டாலின் அவர்கள். இதுகுறித்து நம்முடைய தமிழர் தலைவர் ஆசிரியர் விளக்கமாக விவரமாக நமக்கு சொல்ல விருக்கின்றார் என்றார்   திராவிடர் கழக வெளியுறவு துறை செயலாளர் கோ.கருணாநிதி  அவர்கள்.

உச்சநீதிமன்றத்தின் வரலாறு படைத்த தீர்ப்பு

கடந்த 1.2.2022 அன்று மாலை  உச்சநீதிமன்றத்தின் வரலாறு படைத்த தீர்ப்பு என்ற தலைப்பில் காணொலி கூட்டம் நடைபெற்றது. அக்கூட்டத்தில் திராவிடர் கழக வெளியுறவுத் துறை செயலாளர் கோ.கருணாநிதி  தொடக்கவுரையாற்றினார்.

அவரது தொடக்கவுரையின் நேற்றையத் தொடர்ச்சி வருமாறு:

சென்னை உயர்நீதிமன்றத்தில், ஒன்றிய அரசின் சார்பில் ஆஜரான கூடுதல் தலைமை வழக்குரைஞர் சங்கரநாராயணன் அவர்கள், தன்னுடைய  வாதத்தில் என்ன குறிப்பிட்டார் என்று சொன்னால்,

''பொதுநலம் கருதி, மருத்துவ மாணவர் சேர்க்கையில் சுணக்கம் ஏற்படுவதைத் தடுக்கும் பொருட்டு, ஓபிசி ஒதுக்கீடு கோரும் மனுவினை தள்ளுபடி செய்ய வேண்டும்'' என்றுதான் குறிப்பிட்டிருந்தார்.

இன்றைக்கு உச்சநீதிமன்றத் தீர்ப்பு வந்த பிறகு, தாங்கள்தான் அந்த சமூகநீதிக்காகப் போராடினோம் என்று ஒரு சிலர், குறிப்பாக ஒன்றிய அரசில், ஆளுங்கட்சியில் அந்தக் குரல் கேட்கின்றது என்று சொன்னால், அவர்களுடைய நிலைப்பாடு, ஒவ்வொரு சந்தர்ப்பத்திலும் எவ்வாறு இருக்கின்றது என்பதை சுட்டிக்காட்டுவதற்குத்தான் இந்த ஆதாரப்பூர்வமான தகவலை இந்த மன்றத்திலே நாங்கள் வைக்க விரும்புகின்றோம்.

சென்னை உயர்நீதிமன்ற நீதிபதிகள் அளித்த தீர்ப்பு

அனைத்து வாதங்களையும் கேட்ட சென்னை உயர்நீதிமன்ற நீதிபதிகள் ஏ.கே.சாஹி, செந்தில்குமார் ராமமூர்த்தி அவர்கள், 27.7.2020 அன்று அளித்த தீர்ப்பில் என்ன சொன்னார்கள் என்றால்,

''ஓபிசி பிரிவினருக்கான இட ஒதுக்கீட்டு கொள் கையை சட்டமாக்குவதற்கு ஒன்றிய அரசுக்கு அதிகாரம் உள்ளது. ஒன்றிய அரசு அதிகாரங்களைப் பயன்படுத்து வதிலிருந்து தடுக்கப்படவில்லை.

அதேபோல, பட்டப்படிப்பு, முதுநிலைப் படிப்பு, மருத்துவப் படிப்புகளிலேயே மாநிலங்கள் பங்களித்த அகில இந்திய தொகுப்பு இடங்களில், ஓபிசி பிரி வினருக்கு இட ஒதுக்கீடு வழங்க எந்த சட்டமும் அல்லது அரசமைப்புச் சட்டமும் தடையாக இல்லை'' என்பதாக அந்தத் தீர்ப்பிலே நீதிபதிகள் சுட்டிக்காட்டினார்கள்.

இதனைத் தொடர்ந்து, நாடாளுமன்ற மக்களவை யிலே - திராவிட முன்னேற்றக் கழக நாடாளுமன்றக் குழுத் தலைவர் திரு.டி.ஆர்.பாலு அவர்கள், செப்டம்பர் 23, 2020 அன்று இதே பிரச்சினையை அங்கு எழுப்பினார்.

உறுதியாக நாங்கள் நிறைவேற்றுவோம் என்கின்ற எந்த உத்தரவாதத்தையும் தரவில்லை

அப்பொழுது அதற்குப் பதிலளித்த ஒன்றிய அரசின் சுகாதாரத் துறை இணையமைச்சர் அஸ்வினிகுமார் துபே அளித்த பதிலில்,

''சலோனி குமாரி வழக்கில், அரசின் சார்பில் அளிக்கப்பட்ட மனுவில், அந்தந்த மாநிலத்தில் உள்ள அடிப்படையில்தான் இட ஒதுக்கீட்டை அளிப்போம்'' என்கின்ற அந்தத் தகவலைத்தான் சொன்னாரே தவிர, உறுதியாக நாங்கள் நிறைவேற்றுவோம் என்கின்ற எந்த உத்தரவாதத்தையும் தரவில்லை.

மீண்டும் அந்தப் பிரச்சினையை மக்களவையில், நாடாளுமன்ற உறுப்பினர்கள் தமிழச்சி தங்கபாண்டியன், ஜோதிமணி ஆகியோர் எழுப்பினர்.

அதேபோல, பாட்டாளி மக்கள் கட்சியைச் சேர்ந்த அன்புமணி ராமதாஸ் கடிதம் எழுதினார்.

அனைத்திற்குமே ஒன்றிய அரசின் சார்பில், நாங்கள் இத்தனை சதவிகித இட ஒதுக்கீட்டை அளிப்போம்  அல்லது மாநில வாரியான இட ஒதுக்கீட்டை நிறை வேற்றுவோம் என்பதான பதில் இல்லாமல், அதனை ஒட்டுமொத்தமாக நாங்கள் பரிசீலிக்கின்றோம்  என் கின்ற அளவிலேதான் அரசினுடைய கருத்து இருந்தது.

அகில இந்திய பிற்படுத்தப்பட்டோர் கூட்டமைப்பின் புகாரின் அடிப்படையில்...

இந்த நிலையில்தான், 8.10.2020 அன்று தேசிய பிற்படுத்தப்பட்டோர் ஆணையம், ஒன்றிய சுகாதார செயலாளருக்கு, அகில இந்திய பிற்படுத்தப்பட்டோர் கூட்டமைப்பின் புகாரின் அடிப்படையில் ஒரு உத்தரவிட்டது.

அதில், நீங்கள் வரும் கல்வியாண்டிலே ஓபிசி பிரிவினருக்கு இட ஒதுக்கீட்டை நிறைவேற்றவேண்டும் என்று உத்தரவிட்டிருந்தார்கள்.

ஆனால், அதுகுறித்தும் ஒன்றிய அரசு எந்தவிதமான நடவடிக்கையும் எடுக்கவில்லை.

மாறாக, அக்டோபர் 16, 2020 அன்று, உச்சநீதி மன்றத்தில், ஒன்றிய அரசின் சார்பில், என்ன அபிடவிட் தாக்கல் செய்யப்பட்டது என்று சொன்னால்,

''மருத்துவப் படிப்பிற்கு, அகில இந்திய தொகுப்பில், ஓபிசி பிரிவினருக்கு இந்த ஆண்டு இட ஒதுக்கீடு சாத்தியமில்லை'' என்றுதான் பதிலளிக்கப்பட்டது.

இதர பிற்படுத்தப்பட்ட வகுப்பினருக்கு நீட்டிக்க முடியாது: ஒன்றிய அரசு தகவல்

அதுமட்டுமல்ல, அகில இந்திய ஒதுக்கீட்டிற்கு, மாநில அரசு வழங்குகின்ற மருத்துவம் மற்றும் பல் மருத்துவ இடங்களில்,  இட ஒதுக்கீடு 2020 - இந்த ஆண்டு தமிழ்நாட்டில் இதர பிற்படுத்தப்பட்ட வகுப்பி னருக்கு நீட்டிக்க முடியாது என்று   நீதிபதி நாகேஸ்வரராவ் தலைமையின் அமர்வு முன் ஒன்றிய அரசு தெரிவித்தது.

அதற்குப் பின்பு பிப்ரவரி 23, 2021 அன்று  முதுநிலை படிப்பிற்கான நீட் அறிவிப்பினை ஒன்றிய அரசு வெளியிட்டது.

தி.மு.க. சார்பில் நீதிமன்ற அவமதிப்பு வழக்கு

அதில், பிற்படுத்தப்பட்டோருக்கான இட ஒதுக்கீடு குறித்து எந்தவிதமான அறிவிப்பும் இல்லை. அதன் பிறகுதான், திராவிட முன்னேற்றக் கழகத்தின் சார்பில், மார்ச் 2, 2021 ஆம் தேதியன்று நீதிமன்ற அவமதிப்பு வழக்கினை சென்னை உயர்நீதிமன்றத்தில் தொடுத் தார்கள்.

அந்த வழக்கின் அடிப்படையில், ஜூலை 20, 2021 ஆம் தேதியன்று இதுகுறித்து சென்னை உயர்நீதிமன்ற நீதிபதிகள், ஒன்றிய அரசினுடைய கவனத்திற்கு இந்தப் பிரச்சினையைக் கொண்டு வந்து,  சென்ற ஜூலை 21, 2020 அன்று நாங்கள் அளித்த தீர்ப்பினை நீங்கள் மதிக்கவில்லை; அதனை அவமதித்தீர்கள் என்று கண்டனம் செய்தார்கள்.

நீதிபதிகள் அளித்த தீர்ப்பின் வாசகம்!

அந்த வாசகங்களை இங்கே நான் சொல்ல விரும்புகின்றேன்.

"The Union government's attempt to not implement the OBC reservation quota in respect of the All India Quota (AIQ) seats for admission to medical courses in the state in the academic year 2021-22 appears to be contumacious, inderogation of the order dated July 27, 2020, passed by this court and contrary to the representation made before the Supreme Court." 

contumacious  என்ற கடுமையான வார்த் தையைப் பயன்படுத்தினார்கள்.  contumacious    என்று சொன்னால், திட்டமிட்டே கீழ்ப்படியாமை  இருப்பது என்பதுதான் என்று உயர்நீதிமன்ற நீதிபதிகள் சொன்னார்கள். அதுமட்டுமல்ல, எங்களுடைய ஆணையை ஒன்றிய அரசு அவமதிக்கின்றது என்கின்ற வார்த்தையைப் பயன்படுத்தினார்கள்.

ஓபிசி பிரிவினருக்கு இட ஒதுக்கீடு அளிக்காமல், கலந்தாய்வினை நடத்த முடியாது

அந்த வழக்கின் தீர்ப்பில் மேலும் அவர்கள் சொன்னது, ''நீங்கள், வருகின்ற இந்த ஆண்டிலே, அகில இந்திய தொகுப்பு இடங்களில் ஓபிசி பிரிவினருக்கு இட ஒதுக்கீடு அளிக்காமல், கலந்தாய்வினை நடத்த முடி யாது என்று சொல்லிவிட்டார்கள்.

அதனால்தான், உடனடியாக ஒன்றிய அரசினுடைய தலைமை வழக்குரைஞர் துஷார் மேத்தா 26.7.2021 அன்று, சென்னை உயர்நீதிமன்றத்திற்கு வந்து, ஒன்றிய அரசு இதுகுறித்து விரைவான முடிவை எடுத்திருக்கிறது; அதனை ஓரிரு நாளில் அறிவிக்கும்'' என்றார்.

உயர்ஜாதி  அரிய வகை ஏழைகளுக்கும் தருவோம் என்பதை இணைத்து அந்த ஆணையை வெளியிட்டது ஒன்றிய அரசு

அதனைத் தொடர்ந்துதான், ஜூலை 29, 2021  அன்று சென்னை உயர்நீதிமன்றத்தில், நீதிமன்ற அவமதிப்புக் கண்டனத்தைத் தொடர்ந்து ஒன்றிய அரசு மருத்துவப் படிப்பில், அகில இந்திய தொகுப்பு இடங்களில், பிற்படுத்தப்பட்டவர்களுக்கு 27 சதவிகித இட ஒதுக்கீடு அளிக்கப்படும் என்பதான ஆணையை  -அத்தோடு யாரும் கேட்காமல், எந்தப் போராட்டமும் இல்லாமல், எந்தக் கோரிக்கையும் இல்லாமல், 10 சதவிகித இட ஒதுக்கீட்டினை உயர்ஜாதி  அரிய வகை ஏழைகளுக்கும் தருவோம் என்பதை இணைத்து அந்த ஆணையை வெளியிட்டது ஒன்றிய அரசு.

இந்த நேரத்தில் இன்னொரு செய்தியையும் இங்கே நான் குறிப்பிட விரும்புகின்றேன்.

நாக்பூர் நீதிமன்றத் தீர்ப்புக்குத் தடையாணையைப் பெற்றனர்

இதேபோன்ற ஒரு வழக்கு, நாக்பூர் நீதிமன்றத்தில் 2018 ஆம் ஆண்டு நடைபெற்றது. அந்த வழக்கில், 27 சதவிகித இட ஒதுக்கீட்டை அகில இந்திய தொகுப்பு இடங்களில் தரவேண்டும்  என்று ஒன்றிய அரசுக்கு 31.7.2018 அன்று தீர்ப்பு வழங்கியது.

அன்றைய தினம் நீதிமன்றத்தில் ஆஜரான ஒன்றிய அரசினுடைய வழக்குரைஞர், இதுகுறித்து சென்னை உயர்நீதிமன்றத்தில் வழக்கு இருக்கிறது - ஆகவே, ஒரு நாள் நீங்கள் காத்திருக்கவேண்டும் என்று சொல்லிவிட்டு, மறுநாளே, 1.8.2018 அன்று உச்சநீதிமன்றம் சென்று, நாக்பூர் நீதிமன்றத் தீர்ப்புக்குத் தடையாணையைப் பெற்றனர்.

இதுதான் வரலாறு.

இதுபோன்ற நிலைமையில்தான், ஒன்றிய அரசு தொடர்ந்து செய்துகொண்டு வந்தது. இறுதியாக, 29.7.2021 அன்று நீதிமன்ற அவமதிப்பு வழக்கிற்கு - கண்டனத்திற்கு எதிரொலியாகத்தான் ஒன்றிய அரசு 27 சதவிகித இட ஒதுக்கீட்டினை அளிக்கக்கூடிய ஒரு நிர்ப்பந்தத்திற்கு ஆளானது என்கின்ற செய்தியை இந்த நேரத்தில் நான் பதிவு செய்ய விரும்புகின்றேன்.

அந்த அளவிலேதான், உச்சநீதிமன்றத்தின்  29.7.2021 அன்று கொடுத்த ஆணைக்கு எதிராக, உச்சநீதிமன்றத் தில் ஒரு வழக்கு வந்தது - அந்த ஆணை செல்லாதது என்று அறிவிக்கவேண்டும் என்று. முக்கியமாக, உயர்ஜாதி ஏழைகளுக்கு எதிராகத்தான் வழக்கு. ஆனால், அது மட்டும் எடுக்கப்பட்டு இருந்தால், நிச்சய மாக அதற்குத் தடை கூட கிடைத்திருக்கும்.  ஆனால், அவ்வாறு தீர்ப்பு வந்துவிடும் என்கின்ற எண்ணத் தினால்தான், ஒன்றிய அரசு, 27 சதவிகித இட ஒதுக் கீட்டையும் இணைத்து அறிவிப்பை வெளியிட்டதோ  என்கின்ற சந்தேகம் இன்றைக்குப் பலருக்கும் இருக் கிறது.

உயர்ஜாதி அரிய வகை ஏழைகளைப்பற்றித்தான் தொடர்ச்சியாகக் கேள்வி எழுப்பினர் நீதிபதிகள்!

ஆனால்,  அந்த வழக்கில் தீர்ப்பு வழங்கப்பட்ட பொழுது, உச்சநீதிமன்றத்தில் நீதிபதிகள் 27 சதவிகித இட ஒதுக்கீட்டைப்பற்றி எந்தக் கேள்வியும் கேட்க வில்லை.

மாறாக, உயர்ஜாதி அரிய வகை ஏழைகளைப் பற்றித் தான் தொடர்ச்சியாகக் கேள்விகளை வைத்தார்கள்.

அந்த 10 சதவிகிதத்திற்கு உங்களிடத்திலே தரவுகள் இருக்கின்றனவா?

8 லட்சம் ரூபாய் வருமான வரம்பை எதனடிப் படையில் வைத்தீர்கள்? என்கின்ற இரண்டு  கேள்வி களுக்கும் ஒன்றிய அரசு இதுவரை பதிலளிக்கவில்லை.

மாறாக, ஒரு குழுவை நியமித்து, அந்தக் குழு கொடுத்த அறிக்கையின் அடிப்படையில்தான், நாங்கள் அதனை நியாயப்படுத்துகின்றோம் என்ற அடிப்படை யில்தான், 8 லட்சம் ரூபாய்க்கு மேல் வருமானம் இருந்தால், அவர்களுக்கு 10 சதவிகித இட ஒதுக்கீடு இல்லை என்பதாக, ஒரு குழுவினுடைய அறிக்கையை வைத்தார்கள்.

வரலாற்றுச் சிறப்புமிக்கத் தீர்ப்பு

ஆனால், இந்த ஆண்டு, அதனை தடை செய்யக் கூடாது என்கின்ற நிலையிலேதான், 7.1.2022 அன்று, மாண்புமிகு நீதிபதிகள் டாக்டர் சந்திரசூட், போபண்ணா ஆகியோர், 27 சதவிகித இட ஒதுக்கீடு உறுதி செய்யப்பட்டது என்கின்ற வரலாற்று சிறப்புமிக்கத் தீர்ப்பினைக் கொடுத்து,

EWS தொடர்பாக வழக்கினை மார்ச் மாதம் 3 ஆம் வாரத்திற்கு ஒத்தி வைத்து, இந்த ஆண்டு இதனைக் கடைப்பிடிக்கவேண்டும் என்றும் சொல்லியிருக்கிறார்கள்.

இந்த வரலாற்று தொகுப்பை இங்கே பதிவு செய்ததற்குக் காரணம், இன்றைக்குப் பலரும், இந்த வெற்றிக்கு, இந்த சரித்திரம் வாய்ந்த தீர்ப்பிற்கு, தாங்கள்தான் போராடினோம், தாங்கள் தான் கோரிக்கை வைத்து வென்றோம் என்று  சிலர் சொல்லிக் கொள்கிறார்களே,  அதற்காக. உண்மை யாகப் போராடியது திராவிட இயக்கம், தமிழ் நாட்டில் தொடங்கிய இயக்கத்தின் காரணமாகத் தான் இத்தகைய வரலாற்று சிறப்புமிக்கத் தீர்ப்பினை நாம் பெற்றிருக்கின்றோம் என்று உணர்த்துவதற்காகத்தான் அந்தக் கருத்துகளை இங்கே சொல்லியிருக்கின்றேன்.

தமிழ்நாட்டில் உள்ள அனைத்துக் கட்சிகளும்

ஒரே உணர்வில்...

அந்த வகையிலேதான், தமிழ்நாட்டில் உள்ள அனைத்துக் கட்சிகளும் ஒரே உணர்வில், இந்த சமூக நீதிப்  போராட்டத்தினை நடத்தினார்கள்.

திராவிட முன்னேற்றக் கழகத் தலைவர் சமூகநீதிக் கான சரித்தரி நாயகர் - சட்டப் போராட்டத்தினைத் தொடர்ந்து நடத்தி, இந்த சாதனையைப் படைத்திருக் கின்றார். அவருக்கு நம்முடைய வாழ்த்துகள்!

அதேபோன்று நீதிமன்றத்தில் மிகச் சிறப்பான முறையிலே வாதாடி, திறன்பட வாதங்களை எடுத்து வைத்த மூத்த வழக்குரைஞர் பி.வில்சன் எம்.பி., அவர்களுக்கு நம்முடைய பாராட்டினைத் தெரிவித்துக் கொள்கிறோம்.

உச்சநீதிமன்றத் தீர்ப்பு குறித்து தமிழ்நாடு முதலமைச்சர் அவர்கள் கூறிய இரண்டு செய்திகள் மிக மிகச் சிறப்பான செய்திகளாகும்!

தந்தை பெரியாருக்குக் காணிக்கையாக்குகிறேன்

ஒன்று, அந்தத் தீர்ப்பு வந்த நேரத்தில், அவர் சொன்ன கருத்து என்னவென்று சொன்னால்,

இந்தத் தீர்ப்பை நான் தந்தை பெரியாருக்குக் காணிக்கையாக்குகிறேன் என்று சொன்னார்.

அதேபோல, சமூகநீதியின்பால் பற்றுகொண்ட தி.மு.க.விற்கும், தமிழ்நாட்டு மக்களுக்கும் கிடைத்த மிக முக்கியமான வெற்றி. சமூகநீதி வர லாற்றில் முக்கியமான மைல்கல் என்று சொன்னார்.

நம்முடைய தமிழர் தலைவர்அவர்களும், அதே கருத்தை வலியுறுத்துகின்ற வகையில்தான் அறிக்கை வெளியிட்டார்கள்.

நூறு விழுக்காடு இடத்தையும் நிரப்பிக் கொள்ள நடைமுறையும் வரவேண்டும்

அதுமட்டுமல்ல, முதலமைச்சர் தன்னுடைய அறிக்கையில் மேலும் இரண்டு செய்திகளை கூறினார்.

அந்த வாசகங்களை நான் இங்கே சொல்ல விரும்பு கின்றேன்.

''அண்மைக்காலத்தில், எல்லா மாநிலங்களிலும் பரவலான அளவில் மருத்துவக் கல்லூரிகள் தொடங்கப் பட்டு, அந்த மாநில மாணவர்கள், தங்கள் மாநிலத் திலேயே படிப்பதற்கான வாய்ப்புகள் அதிகரிக்கப் பட்டுள்ளன.

எம்.டி., எம்.எஸ். போன்ற முதுநிலை படிப்புகள் மட்டுமின்றி, எம்.பி.பி.எஸ். படிப்பிலும் அகில இந்திய தொகுப்பு இடங்கள் ஒதுக்கப்படும் முறைக்கு முற்றுப் புள்ளி வைத்து, ஒவ்வொரு மாநிலமும், அதன் இட ஒதுக்கீட்டுக் கொள்கையைப் பின்பற்றி, நூறு விழுக் காடு இடத்தையும் நிரப்பிக் கொள்ள நடைமுறையும் வரவேண்டும் என்பதுதான் தி.மு.க.வின் நிலை.

இரண்டு, அதை நோக்கிப் போராடுவதோடு,  தாழ்த் தப்பட்ட, பிற்படுத்தப்பட்ட மக்களுக்கு ஒதுக்கீட்டை அதிகப்படுத்தவும் எதிர்காலத்தில் முயற்சிகளைத் தொடருவோம்'' என தி.மு.க. தலைவரும், தமிழ்நாடு முதலமைச்சருமான திரு.மு.க.ஸ்டாலின் அவர்கள் கூறிய கருத்துகள் நிச்சயமாக பாராட்டத்தக்க ஓர் அறிவிப்பாக நாம் பார்க்கவேண்டும்.

நீதிபதிகளுக்குப் பாராட்டு!

இந்த நேரத்தில், உச்சநீதிமன்றத் தீர்ப்பு - பிற் படுத்தப்பட்டோருக்கான இட ஒதுக்கீட்டினை உறுதி செய்த நீதிபதிகள் டாக்டர் சந்திரசூட், போபண்ணா ஆகியோருக்கு நம்முடைய பாராட்டைத் தெரிவித்துக் கொள்கிறோம்.

தகுதி, திறமை, மதிப்பீடு குறித்து அவர்கள் அளித்திருக்கின்ற விளக்கமானது மிகமிக சிறப்பானது.

இதுநாள் வரை நம்முடைய திராவிட இயக்கம், தந்தை பெரியார் தொடங்கி, சமூகநீதி ஆர்வலர்கள் கூறி வந்த தகுதி திறமை குறித்து அரசமைப்புச் சட்டம் 15(4), 15(5) ஆகியவை குறித்த விளக்கமும், நமது அடுத்தகட்ட சமூகநீதி குறித்து பெரும் கேடயமாக விளங்கும் என்பதில் மாற்றுக் கருத்து இருக்க முடியாது.

நம்முடைய தமிழர் தலைவர் அவர்கள் இங்கே விரிவாக, விளக்கமாக நமக்கு சொல்லவிருக்கின்றார்கள்

ஆகவே, உச்சநீதிமன்றத் தீர்ப்பு வரலாற்றுச் சிறப்பு மிக்க தீர்ப்பாக இருக்கிறது. அந்தத் தீர்ப்பினுடைய விளக்கங்கள் மிகமிக ஆழமானவை; மிகமிக சிறப் பானவை என்பதை நம்முடைய தமிழர் தலைவர் அவர்கள் இங்கே விரிவாக, விளக்கமாக நமக்கு சொல்லவிருக்கின்றார்கள்.

அவருடைய கருத்தினை நாம் அனைவரும் கேட்போம்.

வாய்ப்புக்கு நன்றி!

வணக்கம்!

இவ்வாறு  திராவிடர் கழக வெளியுறவுத் துறை செயலாளர் கோ.கருணாநிதி அவர்கள் உரையாற்றினார்.